Thursday 14 April 2022

ගෝටාගෝගම ගියෙමි, සතුටෙන් ඇඬුවෙමි! - Once in a lifetime opportunity to change the country


මවගේ රෝගී තත්වය නිසා හදිසියේ ලංකාවට ආ මට, ඒ ශල්‍යකර්ම යනාදිය අවසාන වී, මද ඉසුඹුවක් ලැබුණේ දින හයකට පසුව ය.

ඒ ලද අවසරයෙන් මට ගෝටාගෝගම වෙත ගොස් හැකි පමණින් ඒ විරෝධතා ව්‍යාපාරයට සහභාගී වීමට ඉඩ ලැබුණි.

පිලියන්දල සිට පොදු ප්‍රවාහන සේවාවකින් කොටුව ප්‍රදේශයට ගොස්, පැරණි මතකයන් අවදිකරවන මගක් ඔස්සේ, ගෝටාගෝගම පිහිටා ඇති ප්‍රදේශය වෙත මා ළඟා වූයේ ලේහවුසිය, රීගල් සිනමාහල, මහලේකම් කාර්යාලය දුම්‍ රිය නැවතුම් පොළ, කොටුවේ පන්සල, ගලධාරි හෝටලය වැනි මං සළකුණු නිරීක්ෂණය කරමිනි.

පෙර එක් දිනයක යුවතියක සමග මේ මග ඔස්සේ ම කොටුවේ සිට ගාලුමුවදොර දක්වා ගිය ගමනක් මේ මොහොතේ මගේ සිහියේ ඇඳේ.

එදා ඒ යුවතිය සමග ඇවිද ගියේ තරුණයෙකි.

මෙදා තනිවම ඇවිද ගියේ මැදිවියේ පසුවන මිනිසෙකි.

තනිවම කීවාට තනිවම ම නොවේ. මා සමගම ඒ මාර්ගයේ තවත් බොහෝ දෙනෙකු ගෝටාගෝගම දෙසට ඇවිදිමින් සිටියහ. ඒ බොහෝ දෙනෙකු තරුණ තරුණියෝ වූහ.

ගෝටාගෝගම යනු කුමක්දැයි අද මේ ලිපිය කියවන කිසිවෙකුට අමුතුවෙන් විස්තර කළ යුතු නැතිවුවත්, පසු කලෙක අහම්බෙන් මේ සටහන දකින, ඒ ගැන අසා නැති අයෙකු වෙත් නම්, ඒ අයගේ ප්‍රයෝජනය පිණිස කියනවා නම් මේ ලංකාවේ සිටි වඩත්ම අදූරදර්ශී, වඩාත්ම ජඩ, වඩාත්ම අමන පාලකයා වූ ගෝටාබය (හෙවත් ගෝඨාභය) රාජපක්ෂ සහ ඔහුගේ ඇම්බැට්ට රජය පළවා හැරීම සඳහා පෙළ ගැසුණු තරුණ විරෝධතාකරුවන්ගේ සටන් බිමයි. නුදුරු දිනයක දී ඓතිහාසික ජයග්‍රහණයකින් අවසන් වෙනු ඇතැයි මා තරයේ විශ්වාස කරන අරගලයක මාතෘ භූමියයි.

වීඩියෝ සහ ඡායාරූප මගින් මේ සටන් බිම මා දැක තිබුණ ද, එය සැබැවින් මගේ දෙනෙතින් ම සජීවීව දැක, සටන්කරුවන් අතර සිටිමින් මා ලද අත්දැකීම එයට හාත්පසින් ම වෙනස් ය.

එකිනෙකා නාදුණන, එ මෙන් ම හඳුණන, තරුණ, මැදිවියේ අය, එක්වත්, කුඩා කණ්ඩායම් ලෙසත් විරෝධතාවය දක්වති. සටන් පාඨ කියති. විවිධ සටන් පාඨ ලියවුණු පිකට් බෝඩ් ප්‍රදර්ශනය කරති. අරගලකරුවන්ට විවිධාකාර සේවා සපයන අය ද බොහෝ ය. රාත්‍රියේ විවේකයක් ගැනීමට අවශ්‍ය අයට සෙවන සැපයීමට ඉදිකෙරුණු කූඩාරම් රාශියක් ද විය. මේ කිසිවකට ඇද හැලෙන මහ වැස්ස භාධාවක් නොවේ. කුඩ, වැසි කබා, සෙවන සළසන තාවකාලික මඩු මගින් අරගලකරුවන්ට මද පිහිටක් සැපයේ.

මෙය, මුඛ්‍ය අරමුණ සාක්ශාත් කර ගන්නා තුරුම, එනම් ගෝටාබය රාජපක්ෂ ඇතුළු අසංවේදී ජඩ හොර නඩය පන්නා දමන තුරුම පවතින සටනක් බව පෙණුනි.

පෙර කී මැදිවියේ පුද්ගලයාගේ නෙතට කඳුළු ගලා ආවේ ඒ මොහොතේ දී ය.

ඒ කඳුළට හේතුව කුමක් ද?

තාරුණ්‍යය සිහිවීම ය.

එදා ජේ.ආර්. ජයවර්දෙන නම් ජඩ පාලකයා සහ උගේ කල්ලිය විසින් ගත් ඇතැම් තීරණවලට විරුද්ධව සටන් පාඨ කියමින් ගලහ හන්දියේ ද, මහනුවර නගරයේ දී ද කළ විරෝධතා සිහිවීම ය.

අප පැතූ ඒ සාධාරණ සමාජය අපේ ජීවිත කාලය තුළ දී ම උදාවෙනු දකින්නට සැබෑ හැකියාවක් ඇති බව වැටහීම ය.

ඒ සඳහා සාමාන්‍ය සහභාගීත්වයට අමතරව වඩාත් සක්‍රීය දායකත්වයක් ලබා දෙන්නට අපහසුතා ඇති බව වැටහීමේ දුක ද එ අතර වී ය.

පැයක් පමණ ගෝටාගෝගමේ රැඳී සිටි මා ආපසු නිවස බලා ආවේ යහපත් හෙට දවසක්, සාධාරණ සමාජයක්, දූෂණය පිටු දකින අලුත් ආණ්ඩුවක් ගැන සිතේ ඇති වූ බලාපොරොත්තු ගොන්නක් ද සමගිනි.

සුතනඹුවන් කරා යාමට පෙර යළි දවසක ගෝටාගෝගම වෙත යාමට අදහස් කරමි.

-රසික සූරියආරච්චි, #gotagohome2022, #gohomegota2022

ප/ලි: එදින රාත්‍රියේ ගෝටාගෝගම දී මා දුටු සිත්ගත් සටන් පාඨයක් මෙසේ ය.

පළමුව විගණනය
දෙවනුව වැලිකඩ

(image: )

13 comments:

  1. අරගලයට දැකීමත් පිනකි . ජයවේවා

    ReplyDelete
  2. සජබෙ වද්දා ගොනැගීමට ගත් තීරණය පවා ඉතා සුබදායි කාරණයක්..... අරගලයට ජය!

    ReplyDelete
    Replies
    1. ඔහොම කියන්ඩ එපා බොල. රසිකගෙ ආතල් කුඩු වෙනවා නෙ.

      Delete
  3. ‘මම නං බය නෑ’ කිව්වලු ඉස්සර - මිතුරෙක් කළුවර වෙලාවක
    ඇහුවලු අනෙකා ‘එහෙනං ඇයි බං - හෝදන්නේ උඹ මගේ පුක?’
    කතන්දරේ මගෙ සිහියට එනවා - අනේ මං කරන්නේ මක්ක
    බය නැති ලොක්කා හැංගිල වාගෙයි - සේනා රැකවරණය එක්ක

    මේ තත්ත්වය ගැන මං ලියාපු කවි කොළයේ කවියක් මතක් වුණා.
    https://nidigepanchathanthare.blogspot.com/2022/04/blog-post_10.html

    ReplyDelete
  4. ඕඕන්න ගෝටගමට පප්පෙක් එනව.
    පප්පෙක් කිව්වට නිකංම නිකං පප්පෙක් නෙවෙයි ඔසී දේසෙ සිනුවර ඉඳල එන මැවිසුරු පප්පෙක්.
    ඉස්සරනං එයා මෙතනට ආවේ තව ගෑල්ලමේක් එක්ක ඒත් අද තනියම.

    ඕඕන්න දැන් සිනුවර පප්පා සෙනග මැදට යනව
    රේන්කෝට් එකක් දාගත්ත 'ගෝ' පප්පෙක් රසිකට සෝටීස් එකකුයි ප්ලේන්ටියකුයි දෙනව.
    ඒක බීපු පප්ප කොහේදෝ තිබිල ඕන්න ඇදලගන්නව කවි කොලයක්!


    සිනුවර සිට 'කො'පුර ආවේ මව්ගේ දුක සැප බලන්න
    සටන්කරුවො මැදට ගියා 'ගො'පුර ගමේ සැටි බලන්න
    ගලහ හංදියේදී අපි කළ විරෝධතා සිහිවෙනවා
    සිනුවර යාමට පෙර යළි රසික 'ගො'පුර පැමිණෙනවා!

    රසිකගේ #GoGotaHome2022 සහායට බොහොම ස්තුතියි!

    ReplyDelete
  5. නොනිදන නගරයකි
    අරගලය රැඳි බිම්කඩකි
    අරුමය බලන් සකි
    දැකුම නුඹ කල මහ පිනකි

    ReplyDelete
  6. බොහොම හොඳයි.

    ReplyDelete
  7. සතුටුයි අහන්න.

    ReplyDelete
  8. අරගලයට ජය

    ReplyDelete
  9. මෙහේ ඉඳන් හැමදාම හිතන්නේ එතන ඉන්න තිබ්බනං කියලා...

    ReplyDelete
  10. නැවතත් හරිම අනුවේදනීය කතාවක් 🥲

    ReplyDelete

ඔබේ ප්‍රතිචාරය මට සතුටකි!. Your comments are most welcome!
සංයමයෙන් යුතුව ප්‍රතිචාර දක්වන්න.