රසිකොලොජි බ්ලොගයට සුබ උපන්දිනයක් වේවා - It has been eight years

රසිකොලොජි බ්ලොගය අරඹා අදට අවුරුදු අටකි.

බ්ලොගය ඇරඹූවේ මගේ උපන්දින සංවත්සර දිනයක් නිසා, අද මගේ උපන්දිනය ද යෙදේ. මෙන්න ඒ වෙනුවෙන් මගෙන් කෙටි ගී කණ්ඩයක්. මෙය වෝල්ටර් ප්‍රනාන්දුගේ ගීතයක කොටසක කොපියකි.
අවුරුදු හතලිස් තුනයි වයස
බැලුබැල්මට කියන්න බෑ
තවමත් කොල්ල වගේ ඉන්නේ
හැට පැන්නත් නාකි වෙන්නේ නෑ

- රසිකොලොජිස්ට්

ප/ලි:
මෙන්න පසුගිය බ්ලොග් සංවත්සර දිනවල පළ කළ සටහන් කිහිපයක්.

1. හයේ පන්තියේ ළමයෙකු ගේ වැඩ කිඩ - Double celebration...!!!
https://rasikalogy.blogspot.com/2015/10/double-celebration.html

2. ජාතික හෙළ උරුමියේ සාදුලා පාර්ලිමේන්තුවට ගියේ සාරි ඇඳගෙන ද? - Rasikology celebrates its second birthday!
https://rasikalogy.blogspot.com/2016/10/rasikology-celebrates-its-second.html

3. නාකි වෙන්නේ කවදා ද? - Forever young
https://rasikalogy.blogspot.com/2017/10/forever-young.html

4. සිංහල බ්ලොග් ලේඛන කලාවේ අවගමනය - A turning point?
https://rasikalogy.blogspot.com/2018/10/turning-point.html

5. සුබ පැතුමක් සහ පිළිතුරක් - My reply to an interesting birthday greeting
https://rasikalogy.blogspot.com/2019/10/my-reply-to-interesting-birthday.html

ඥාණවතී ද පබාවතී ද? Beauty Vs Brains

උදන්ත අබේරත්න, රෙස්-ඇප් සහ ෆයිසර් - Click-bait headlines

මගේ විශ්වවිද්‍යාල සගයකු සහ දිගු කාලීන මිතුරෙකු වන ඉංජිනේරු උදන්ත අබේරත්න විසින් කලකට ඉහත සිදු කරන ලද ලද පරීක්ෂණයක ප්‍රතිඵල ලෙස සොයා ගත් ක්‍රමවේදයක් උපයෝගී කර ගනිමින් පසුව නිපදවන ලද චිකිත්සක මෘදුකාංගයක් බහුජාතික ෆයිසර් ඖෂධ සමාගම මගින් ඩොලර් මිලියන 179 කට මිල දී ගත් පුවත මේ වන විට ලංකාවේ අන්තර්ජාල මාධ්‍ය ඔස්සේ මෙන් ම විවිධ සම්ප්‍රදායානුකූල පුවත් මාධ්‍යවල ද පළ වී කරණම් ගසමින් ඇත.

එවැනි ලාංකේය මාධ්‍ය ආයතන විසින් පළ කර ඇති වාර්තා සෑම එකක ම පාහේ උදන්ත අබේරත්න පිළිබඳව තොරතුරු සඳහන් කරද්දී කරුණු එකිනෙක අනා තරමක් විකෘති කර ඉදිරිපත් කිරීමට අමතරව තවත් ඉතා බරපතළ අපරාධයක් සිදුකර ඇත.

එය නම් ෆයිසර් ආයතනයෙන් උදන්තට ඩොලර් මිලියන ගණනක් ලැබුණි යැයි සාවද්‍ය ප්‍රකාශයක් කිරීමයි. මෙය හිතාමතා කරන ලද්දක් බව පැහැදිලිව ම කිව හැක්කේ මෙම පුවත හා සම්බන්ධ කිසිදු මූලාශ්‍රයක එවැනි පුද්ගලික මුදල් ගනුදෙනුවක සඳහනක් නොමැති හෙයිනි.

ලාංකිකයෙකුට ෆයිසර් සමාගමෙන් ඩොලර් මිලියන එකසිය හැත්තෑ නමයක් ගෙවූ බවට සඳහන් කර ශීර්ෂ පාඨයක් යෙදූ විට එම පුවත ශ්‍රී ලාංකිකයින් අතර ක්ෂණිකවම ජනප්‍රියවන බව අප කාටත් සිතාගත හැකි කරුණකි. මෙවැනි ශීර්ෂ-පාඨ click-baits ලෙස හැඳින්වෙන්නේ ද ඒ නිසා ය.

මා මේ සටහන ලියන්නට සිතුවේ දිගු කලක සිට මෙම නව ක්‍රමවේදය සොයා ගැනීම පිළිබඳවත්, මුදුකාංගය නිෂ්පාදනය පිළිබඳවත් පුද්ගලිකව හමු වූ අවස්ථාවලදී මෙන්ම, දුරකථනය ඔස්සේත්, වෙනත් ඉලෙක්ට්‍රොනික මාධ්‍ය ඔස්සේත් මා උදන්ත අබේරත්නගෙන් කරුණු අසා දැන සිටින නිසාත්, කොටින් ම ජංගම දුරකථන හරහා භාවිතා කිරීමට වැඩිදියුණු කරමින් තිබුණු මෙකී චිකිත්සක මෘදුකාංගයේ මූලික සංස්කරණයක් 2018 තරම් ඈත කාලයක දී ඔහු මට ක්‍රියාත්මක කර පෙන්වා තිබුණු නිසාත්, මේ වන විට ලංකාවේ මාධ්‍යවලින් පළ කෙරෙන පෙර කී පුවත් වාර්තා නිසා ඔහු තරමක හෝ අපහසුතාවයකට පත් වී ඇති බව හොඳින් ම දන්නා නිසාත් ය.

එලෙස ම පසුගිය සතියක පමණ කාලයක් තුළ ඔහු විසින් තමන්ට අති විශාල මුදල් ප්‍රමාණයක් ලැබුණා යයි කියන මෙම සාවද්‍ය ප්‍රවෘත්තිය නිවැරදි කරවා ගැනීමට ගන්නා ලද උත්සාහ සාර්ථක නොවීම පිළිබඳව ද උදන්ත අබේරත්න පසුවන්නේ කලකිරීමෙන් යයි මම සිතමි.

ඔහු විසින් ද ඔහුගේ සේවාදායකයා වන ක්වීන්ස්ලන්ත විශ්වවිද්‍යාලය විසින් ද කෙරුණු කරුණු ඉදිරිපත් කිරීමෙන් පිළිබඳව සමහර ප්‍රවෘත්ති ආයතන ප්‍රතිචාර දක්වා තිබුණද ඔවුන් පවා තමන්ගේ වැරදි ශීර්ෂ පාඨ තවමත් නිවැරදි කර නැත.

මෙම නව තාක්ෂණය උදන්ත අබයරත්න විසින් සොයා වැඩි දියුණු කළේ ඔහු සහාය මහාචාර්යවරයෙකු ලෙස ඕස්ට්‍රේලියාවේ ක්වීන්ස්ලන්ත විශ්වවිද්‍යාලයේ සේවය කරන අවධියේ දී ය. පසුව එම සොයා ගැනීම උපයෝගී කර ගනිමින් මෙම චිකිත්සක මෘදුකාංගය නිපදවීම සඳහා විශ්වවිද්‍යාලය විසින් පුද්ගලික සමාගම අරඹන ලදී. එය පවත්වාගෙන යෑම සඳහා අවශ්‍ය ප්‍රාග්ධනය සොයාගනු ලැබුවේ පුද්ගලික සමාගම් සහ මෙවැනි නව ව්‍යාපාර සඳහා ආයෝජනය කරන පුද්ගලයින් ගෙනි.

රෙස්-ඇප් නම් වූ එම සමාගම කොටස් වෙළද පොළේ අලෙවි කෙරෙන පොදු සමාගමකි. උදන්ත අබේරත්න විසින් සොයා ගන්නා ලද තාක්ෂණයේ ශක්‍යතාව නිසාම මේ නිපදවීම සාර්ථක වූ අතර සමාගමේ කොටස් මිල ඉහළට ගිය අතර අන්තර්ජාතික ඖෂධ සමාගමක් වන ෆයිසර් ආයතනයේ ද අවධානය ඒ කරා යොමු විය. ෆයිසර් ආයතනය විසින් මිලට ගන්නා ලද්දේ එම රෙස්-ඇප් සමාගමයි. ඒ සඳහා ගෙවන ලදැයි පැවසෙන ඩොලර් මිලියන එකසිය හැත්තෑ නමය ලැබුණේ රෙස්-ඇප් සමාගමේ කොටස් හිමියන්ට මිස මා මිත්‍ර උදන්ත අබේරත්නට නොවේ.

උදන්තට ඩොලර් මිලියන ගණනක් ලැබුණු බව කීම අපරාධයක් වන්නේ ඒ නිසා ය.

"ඕක මොන ප්‍රශ්නයක් ද?" කියා මෙය කියවන ඔබට මුලින් සිතෙන්නට ඉඩ ඇත.

නමුත් ඔබ මෙවැනි තත්ත්වයකට පත්වුවහොත් ඇති විය හැකි ප්‍රශ්න පිළිබඳව මදකට සිතා බලන්න.

(හැකි නම් ෂෙයා කරන්න. ස්තුතියි.)

-රසික සූරියආරච්චි

ප/ලි:
මේ පුවත ඕස්ට්‍රේලියාවේ ප්‍රමුඛතම මාධ්‍ය ජාලය වාර්තා කළ අන්දම.
https://www.abc.net.au/news/2022-09-28/qld-pfizer-buys-uq-start-upresapp-health-covid/101478832

ඕස්ට්‍රේලියාවේ ක්වීන්ස්ලන්ත විශ්වවිද්‍යාලය මෙම ප්‍රවෘත්තිය නිකුත් කළ ආකාරය.
https://www.uq.edu.au/news/article/2022/09/uq-startup-acquired-pfizer

රෙස්-ඇප් සමාගමේ වෙබ් අඩවිය.
https://www.resapphealth.com.au/

(image: Udantha and Rasika enjoying Zero Alcohol Beer)