අවුරුදු විසි හතරක් පැරණි ටී ෂර්ට් එකක කතාව - Old and gold...!!!

ඒ 1999 වසරයි.

ඒ කාලයේ සාමාන්‍යයෙන් ඉරි සහිත ටී ෂර්ට්වල ඉරි තිබුනේ හරහට ය. ඒවා ඇන්ද විට, දෘෂ්ටි ප්‍රයෝගයක් නිසා, තමන්ගේ ප්‍රමාණයට වඩා මහතට පෙනෙන බව රහසක් නොවේ.

උඩ සිට යටට ඉරි තිබෙන ටී ෂර්ට් තිබුණේ නම් ඒ ඉතාමත් කලාතුරකිනි.

එනිසා ඒ වසන්තයේ (සැප්තැම්බර්) ටාගට් නම් සාප්පුවේ ඔබ මොබ ඇවිදින මගේ නෙතට මේ ටී ෂර්ට් එක රසඳුනක් විණි.

නමුත් එක් විශාල ප්‍රශ්නයක් විය.

එහි විකුණුම් මිල ඩොලර් 39.90 කි.

ටී ෂර්ට් එක කොච්චර ලස්සන වුණත් එතරම් මුදලක් වියදම් කිරීමට කිසිසේත්ම නොසිතූණි. කොහොමටත් මේ කියන කාලයේ ඩොලර් හතළිහක් යනු විශාල මුදලකි. එනිසාම මම එය මිලට නොගත්තෙමි.

එයට තවත් වැදගත් කාරණයක් ද හේතු විය.

එනම්, සාමාන්‍යයෙන් මේ කඩසාප්පුවල කෙරෙන පරිදි වසන්ත කාලය අවසාන වී, ගිම්හානයේ ද අඩක් පමණ ගෙවෙන විට, එනම් දෙසැම්බර් ක්‍රිස්මස් කාලය නිම වූ පසු අත් කොට කමිස සහ කොට කලිසම් වැනි ග්‍රිස්ම කාලේ අඳින ඇඳුම්වල මිල විශාල ලෙස අඩු වීමයි. මේ ටී ෂර්ට් එක මා මිල දී ගන්නවා නම් ඒ මිල දී ගන්නේ මට අඳින්නට ඇඳුමක් නැති නිසා නොව, එහි ඇති පියකරු බව හේතුවෙන් නිසා කිසිම හදිසියක් ද නැත.

ඉතින් මම ඉවසා සිටියෙමි.

ජනවාරි මාසයේ මුල් සතියේ පමණ සාප්පුව පිහිටි ප්‍රදේශයෙන් යන විට ගොඩවැදී බැලුවෙමි. ටී ෂර්ට් එකක මිල ඩොලර් 10 කින් අඩු වී තිබුණු අතර තවත් ටී ෂර්ට් සෑහෙන ප්‍රමාණයක් විකිණීමට තිබුණි.

මේ ටී ෂර්ට් එක හිමිකර ගැනීම සඳහා ඩොලර් තිහක් පමණ ගෙවීම ද අනවශ්‍ය යයි මට සිතුණි.

තව කල් බලමි.

ඉවසන දනා රුපු යුදයට ජය කොඩිය යැයි කියවේ.

එයින් කුමක් අදහස් කෙරුණේ වුව ද තවත් මසකට පමණ පසු මා දුටුවේ ටී ෂර්ට් කිහිපයක් පමණක් ඉතිරිව ඇති බවත් ඉන් එකක අලුත් විකුණුම් මිල ඩොලර් 19.90 බවත්ය.

මේ මා ඇඳගෙන සිටින්නේ එදා මිල දී ගත් ටී ෂර්ට් එකයි.

මට ටී ෂර්ට් දුසිම් හතර පහක් ඇති නිසාත්, ටී ෂර්ට් අඳින්නේ ගිම්හාන කාලයේ සහ ශ්‍රී ලංකාවේ දී පමණක් නිසාත්, අවුරුදු විසි තුනකට පසුව ද එය සාපේක්ෂව ඉතා හොඳ තත්ත්වයේ පවතී.

ඇත්තටම කියනවනම් සාමාන්‍යයෙන් මා ටීෂර්ට් එල්ලා තබන ස්ථානයේ නොව, වෙනත් කාමරයක කබඩ් එකක උඩ තට්ටුවේ මුල්ලකට වී තිබුණු මේ ටී ෂර්ට් එක මගේ ඇස ගැටී සේදීමෙන් පසුව මා අද මේ ඇන්ඳේ අවුරුදු හතරකට පමණ පසුව යයි සිතමි.

මගේ සිරස් ඉරි ඇති මේ ටී ෂර්ට් එක තව දිගු කලක් දිනේවා!

- රසික සූරියආරච්චි

ප/ලි
ඔය කාලෙන් පසු උඩ සිට යටට සිරස් අතට ඉරි තිබෙන ටීෂර්ට් බහුල ලෙස වෙළඳපලට පැමිණුනි.