ඉතිං අපට පාන් ද? - Off we go...!

මගේ ප්‍රිය බිරිඳ හා මා විවාහ වූයේ මැයි මස විසි අටවැනිදාවක ය.

"ඉතිං මට පාන් ද?" කියා ඔබට සිතුණා ද?

විවාහ වී හරියටම වසර බැගින් ගෙවෙන දිනය, එනම් මැයි මස විසි අටවැනිදාව, මා ප්‍රිය බිරිඳගේත්, මගේත් "විවාහ සංවත්සර" දිනයයි. ඉංගිලිසියෙන් මෙය "වෙඩින් ඇනිවර්සරි"යයි. අපි මෙයට "වෙඩින් ඩේ" හෙවත් "විවාහ දිනය" යැයි නොකියමු.

මා උපන්නේ ඔක්තෝබර් මස විසි හත්වෙනිදාවක ය.

එසේ නම්, අද මගේ "උපත සංවත්සර දිනය" යි. එය ඉංගිලිසියෙන් කියූ විට "බර්ත් ඇනිවර්සරි ඩේ" වේ.

නමුත් සාමාන්‍යයෙන් කවුරුත් කියන්නාක් සේ "උපන් දිනය" යැයි නොකියා ඒ වෙනුවට "උපත සංවත්සර දිනය" යැයි කියූ විට දැනෙන්නේ අමුත්තකි.

ඇතමෙක් මේ "උපත සංවත්සර දිනය" යෙදුමට උපහාසයෙන් සිනාවෙන්නට ද ඉඩ ඇත.

ඉතිං මට පාන් ද?

මගේ උපත සංවත්සර දිනයට පෙර දින, එනම් ඊයේ, රාත්‍රියේ ම මා එළැඹෙන නව වසර සඳහා එක්තරා අදිටනක් කළෙමි. ඒ අදිටන මුදුන්පත් කරවාගන්නට අවශ්‍ය ප්‍රධාන පියවර තබන්නට මට තව වසරක් ඉඩ ඇත.

ඒ සමගම, අද දිනය සමරන්නටද කුමක් හෝ අලුත් දෙයක් කරන්නට ඕනෑ යැයි සිතුවිල්ලක් මට ඇති විය. කෙළින්ම මගේ සිත යොමු වුණේ ජාල සටහනක් එනම් බ්ලොගයක් අරඹන්නටයි.

අද ඇරඹෙන මේ රසිකොලොජි බ්ලොගය ඒ සිතුවිල්ලේ ප්‍රතිඵලයයි!

කෙසේ වෙතත් බ්ලොග් යනු මට අලුත් දෙයක් නම් නොවේ. මා මුලින්ම බ්ලොගයක් ඇරඹුවේ 2005 වසරේ අප්‍රියෙල් මාසයේ දී ය. ඒ ගී පදමාලා අච්චුවෙන් මා ලියූ කවි පළකරන්නට සැදූ පෙම් ගී බ්ලොග් අඩවියයි.

යුනිකෝඩ් සිංහල භාවිතයේ නොතිබුණු ඒ යුගයේ පැවති තාක්‍ෂණ සීමා ඇතුළත සිටිමින් මා කළේ, මුලින් මා දන්නා පරිදි කපුටා අකුරෙන් කවි යතුරු ලියනය කොට, ඊළඟට ඒවා ජේපෙග් ආකාරයේ රූප බවට පෙරළා, අනතුරුව පිකාසා සේවය ඔස්සේ ඒ රූප බ්ලොගර් අඩවියට උඩුගත කරවා පළකිරීමයි.

ඒ මුල් අවදියෙන් පසු යාවත්කාලීන නොවුනද, පොඩි වෙනස්කම් කීපයක් සමග මගේ ඒ පෙම් ගී බ්ලොගය දස වසරකට පමණ පසුවද නිරුපද්‍රිතව තවමත් ඒ ආකාරයෙන් ම පවතී!

දැන් රසිකොලොජි බ්ලොගය ගැන කතා කරමු.

මුලින්ම රසිකොලොජි යන නම ගැන කිව යුතුය. මෙය බයොලොජි, සූලොජි, මීටියරොලොජි, ජියලොජි ආකාරයේ යෙදුමකි. රසිකලොජිය තුළින් ඒ නම ඇත්තා ගැන අධ්‍යයනක් කරන්නට හැකි වේ යැයි සිතමි.

රසිකොලොජි බ්ලොගය හරහා මා අන්තර්ජාලයට මුදා හරින්නට අදහස් කරන්නේ කුමන ආකාරයේ දේ දැයි ඊළඟට සඳහන් කළ යුතුය.

මේ බ්ලොගයේ අන්තර්ගතය මගේ අතීත අත්දැකීම් ගැන ලියවුණු විත්ති කතා විය හැක.
මා කියවා ඇති පොත පත පිළිබඳ මගේ අදහස් විය හැක.
මා වසන ප්‍රදේශය පිළිබඳ නොයෙකුත් විස්තර විය හැක.
ඉඳහිට හෝ කවියක් ලියවුනොත් එය ද රසිකලොජියේ පලවෙන්නට ඉඩ ඇත.
කොටින්ම මගේ සිතට එන ඕනෑම මට වැදගත් යැයි සිතෙන දෙයක් රසිකලොජියේ පළවෙනු ඇත.

"ඉතිං මට පාන් ද?" කියා තවදුරටත් ඔබට සිතෙනවා ද?

ඔබට එසේ නොසිතේ නම් හෙට සිට රසිකොලොජිය කියවන්නට නිතිපතා මෙහි එන්න.

අවාසනාවට මෙන් ඔබට "ඉතිං මට පාන් ද?" කියා තවදුරටත් සිතේ නම්, ඒත්, නිතිපතා මෙහි විත් රසිකොලොජිය කියවන්න.

ස්තුතියි.

-රසිකොලොජිස්ට් (http://rasikalogy.blogspot.com/)

ප/ලි
රසිකලොජි නමින් මුලින් තැබූ බ්ලොගයේ නම රසිකොලොජි වශයෙන් පසුව වෙනස් කළෙමි.

(image: http://farul.org/new-blog-by-rbya/)