අද මා සේවය කළේ නිවසේ සිටයි.
උදෑසන සිට ම අහස අඳුරු ය. සිරිපොද නමුත් වැස්සේ නැවතුමක් නැත.
ගිම්හානයේ අද දක්වාම පැවතුණු වසන්ත සුන්දරත්වයේ අවසන් හුස්ම පොද ද පිටව ගොසිනි!
සිතට එන්නේ අලස, උදාසීන අදහස් ය.
දවසේ වැඩ අවසානයේ සිතේ දුක මෙලෙස ලියවුණි!
ඉතිං මේ හේමන්තයයි
අහස අඳුරුයි පාළුයි
රෝස ගස් පෙළ නිහඬයි
සිහින් ඊතල වැස්සයි
ඉතිං මේ හේමන්තයයි
ගිම්හාන අව්රැල්ල
හතළිහේ පෝරණුව
දැන් සිතට අමතක ය
මල් රේණු, තණ කැබලි
දසත විසුරූ සුළඟ
හමා ගොස් හමාර ය
සියක් ගණනක වර්ණ
එක පෙළට මවා ලූ
මල් මිලින වී ගොස් ය
උදෑසන හිරු මරා
ලොව අඳුරු කළ වැස්ස
නිමාවක් නැති ලෙස ය
දවස හෙමිහිට මියයයි
අමාවක සඳ පායයි
හදවතක දුක නිහඬයි
ඉතිං මේ හේමන්තයයි
-රසිකොලොජිස්ට්
