Thursday 5 August 2021

රටගිය ඇත්තන්ගේ වර්ගීකරණය - My classification of SL migrants



මේ සටහනේ මුල් සංස්කරණය ලියවුණේ ඉහත පළ කර ඇති කතෘ අඥාත ඇස ගැටුණු වෙලේ ය. එය ෆෙස්බුක් අවකාශයේ කිහිප තැනකම බෙදා හැරිය පසු මට බ්ලොගය ද සිහිවිය. මේ දෙවන සංස්කරණය සකසන්නේ ඒ සඳහා ය.

ලංකාවෙන් පිටත වෙනත් රටක ජීවත්වෙන අතරතුර ලංකාව සෑදීම සඳහා කුඩා හෝ දෙයක් කිරීම මානසික රෝගයක් නම් ඒ රෝගය වැළඳුණු අය කොටස් කිහිපයක් සිටිනා බව මගේ නිරීක්ෂණය අනුව කිව හැක.

1. පළමුවෙනි කණ්ඩායම
ලංකාවේ ගංවතුරක් හෝ වෙනත් ව්‍යවසන තත්ත්වයක් හෝ ඇති වූ විගසම තමන් ජීවත් වෙන රටේ පිහිටුවාගෙන තිබෙන විවිධ සංවිධාන හරහා මුදල් එකතු කර ඒ මුදල් හෝ එරටෙන් මිල දී ගන්නා භාණ්ඩ හෝ ලංකාවට යවන සංක්‍රමණික පිරිස.

මෙවැනි ව්‍යාපෘති කිහිපයකටම අපට ද සහභාගි වන්නට ඉඩ ලැබුණි. උදාහරණයක් ලෙස ඉතාම ආසන්නයේ දී අප සම්මාදම් වූ ලංකාවේ කෝවිඩ් රෝගීන් සඳහා රෝහල්වලට වෛද්‍ය උපකරණ යැවීමේ ව්‍යාපෘතිය නම් කළ හැකි යි.

2. දෙවන කණ්ඩායම
තම තමන් ගෙන ගත් පාසැල් හෝ විශ්වවිද්‍යාල හෝ පදනම කරගනිමින් කුඩා කණ්ඩායම් වශයෙන් විද්‍යාර්ථීන්ගේ සංගම් සහ ආදි ශිෂ්‍ය/ශිෂ්‍යයා සංගම් ගොඩනඟාගෙන ඒ හරහා මුදල් එකතු කර තමන් ඉගෙනගත් ආයතන වල විවිධ ව්‍යාපෘති සඳහා මුදලින් ආධාර කරන පිරිස.

මෙවැනි සංගම් කෙරෙහි මගේ කිසිම උනන්දුවක් නැති නමුත් පේරාදෙණිය විශ්වවිද්‍යාලයේ ඉංජිනේරු පීඨයේ මා සමග ඉගෙනුම ලැබූ දැනට විදෙස් රටවල වාසය කරන සගයින්ගේ මූලිකත්වයෙන් මේ සතියේ ලංකාවේදී අරඹන ඉංජිනේරු පීඨයේ ඊඕඊ පෙරේරා ශාලාව වැඩිදියුණු කිරීමේ ව්‍යාපෘතියකට මට සම්මාදම් වීමට අවස්ථාව ලැබුණි.

3. තුන්වෙනි කණ්ඩායම
විදෙස් රටවලදී තමන් උපයා ගන්නා මුදලින් පසුකලෙක ලංකාවේ විවිධ කර්මාන්ත, ව්‍යාපාර යනාදිය ආරම්භ කරන පිරිස.

එවැනි කිහිප දෙනෙකුව මා පුද්ගලිකව හඳුනන බව පවසමි.

4. සිව්වෙනි කණ්ඩායම
මීට අවුරුදු දොළහකට ඉහත කාලය දක්වා නොරටක හාන්සි පුටුවල වාඩි වී ලංකාවේ එවකට පැවති යුද්ධයට පොහොර දමමින් සිටි, යුද්ධයෙන් රට හදන්නට තැත් කළ සිංහල මෙන්ම දෙමළ පිරිස්

යුද්ධයේ අවසානයෙන් පසු ඔවුන්ගෙන් සමහරු වහල් හිමියා යටතේ වහලුන් ලෙස හැසිරෙමින් ලංකාව හදන්නට පටන් ගත් බව දක්නට ලැබුණි. තවමත් ඒ වහල් භාවයෙන් මිදුණේ නැති පිරිසක් ද සිටින බව මගේ නිරීක්‍ෂණයයි. මෙයින් මා හිතන පරිදි බොහෝ දෙනෙකු ඉඩ ලද පළමු අවස්ථාවේදී ම ලංකාවේ පුරවැසිකම හැරදා ඕස්ට්‍රේලියානු පුරවැසිභාවය ලබා ගත් තවදුරටත් ශ්‍රී ලාංකික පුරවැසකම නොමැති අයයි.

5. පස්වෙනි කණ්ඩායම
පෙර කී කිසිදු සංවිධානාත්මක කටයුතු වලට සම්බන්ධ නොවුණත් ද්විත්ව පුරවැසිභාවය ඇති, දෙරටේම තොරතුරු පිළිබඳව එක සේ උනන්දුවක් දක්වමින්, තමන්ට හැකි ආකාරයට රට සෑදීම සඳහා අර්ථයෙන් කෙසේ වෙතත් ධර්මයෙන් සම්මාදම් වෙමින් කල්ගත කරන පිරිසක් ද දැකගත හැකියි.

මීට අමතරව කෙළින් ම රට හැදීමේ ව්‍යාපෘති වලට සම්බන්ධ නොවුණත් පුද්ගලිකව තමන්ගේ දෙමව්පියන්ට, ඥාති මිත්‍රාදීන්ට, වැඩිහිටි නිවාස ආගමික සිද්ධස්ථාන වැනි පුණ්‍යායතනවලට මුදල් යවන පිරිස නම් අති විශාලයි. ඔවුන් ලංකාවේ විදෙස් විනිමය සංචිතය ඉහළ නංවා ගැනීමට ලොකු සේවයක් කරන අතර එමගින් රට හැදීමට දායක වෙන බව ද පැවසිය යුතුයි. ඉහත රූපය සාදා ඇත්තේ ඉහත පිරිස් ගැන නොවේ.

පසුගිය කාලය තුළ මා නිරීක්‍ෂණය ඇති කරුණක් නම් ලංකාවේ වෙසෙන සමහරුන්ට ලංකාවෙන් පිටත ජීවත්වෙන අය සමග මොකක් දෝ ආරවුලක් තිබේ. ඒ අය පිළිබඳව ද මගේ විශ්ලේෂණයක් ඇත.

එය පසුව ලියමි.

-රසික සූරියආරච්චි (image: from Facebook, creator unkown)

10 comments:

  1. 4 වෙනි කණ්ඩායමේ අය යුද්ධයෙන් පසු බිහිවූ ආණ්ඩු වලට සමාජ ජාලා ඔස්සේ ධර්ම දේශනාවේ නිරත වේ. ඔවුන් රටේ ප්රජාතන්ත්රවාදය ට (චන්දය දීමෙන් ) හෝ ආර්ථිකයට ( මුදල් , ශ්‍රමය හෝ භාණ්ඩ ) කිසිදු දායකත්වයක් නොදෙයි . මේ පුද්ගලයන් ස්ථිර පදිංචියට සංවර්ධිත රටවලට ගියවුන් මිස රැකියා සඳහා ගිය අය නොවෙයි.ඔවුන් තම පුද්ගලික හේතු මත මිස රටේ ජීවත් වීමට නොහැකිව පිටරට ගිය අය ද නොවෙයි.

    පිටරට ගිය මගේ නෑ හිතමිතුරු බහුතරයෙන් 40% ක් පමණ මේ කුලකයේ සිටියි

    ReplyDelete
  2. ලංකාවෙන් පිට රටවල පදිංචියට ගිහිං, ලංකාවට විදෙස් මුදලක් එවන අය නං ලංකාවේ හොද නරක ගැන කතා කරාට කමක් නැහැ. එහෙම නැතුව ලංකාවට මුදලක් එවන්නෙත් නැතුව ඉන්ටනෙට් එකෙන් උපදෙස් දෙන්න එන මිනිස්සුයි, ලංකාවේ වැරදි හොයා හොයා ඉන්න මිනිස්සුයි නං මට අප්‍රසන්නයි.

    රංග

    ReplyDelete
  3. රසික, ඔබ අවසනයේ සඳහන් කර ඇති නිරීක්ෂණයට සම්පූර්ණයෙන්ම එකඟ වෙමි.
    මමද කාලයක් 1 -3 දක්වා වූ කණ්ඩායම් වලට අයත්ව සිටියෙමි. එහෙත් ඔබ කළ නිරීක්ෂණය අවබෝධ වූ පසු ඒ හැම කණ්ඩායමකින්ම ඉවත් වී සිටිමි.
    කාලෝචිත ලිපියක් ලිවීම ගැන ස්තුති වන්ත වෙමි.

    ReplyDelete
  4. කොහේ උන්නත්- කොහොම හිටියත්- උපන් බිම ගැන තියෙන ඇම්මක්
    අයගෙ වැඩ ගැන මට තියෙන්නේ - සතුට මුසු වුණු පසන් හැඟුමක්
    මිනිස් වග වෙත; ලෝ සතන් වෙත - කරන සොච්චං යහ මෙහෙවරක්
    අගය කෙරුමය, පුරුදු කළ යුතු - නැතිව පපුවේ ඉරිසියාවක්!

    ReplyDelete
  5. රට ගිය අයට එහෙම වෙන්න හේතුව? Conflict of interests? O.o

    ReplyDelete
  6. Agree. I started in group 2, for the first 2 years .Now I am in group 1 and 5. I cherish my memories in Sri Lanka but I try my best to not to be vocal about my political stance or opinions.

    ReplyDelete
  7. මා සංස්කරණය කරන "සිසිල" සිංහල ඊ-සඟරාවේ මුල් කලාපය 2021 සැප්තැම්බර් පළමුවෙනිදා නිකුත් වුණා.
    පිටපතක් ලබා ගැනීම සඳහා ඔබේ ඊ-මේල් ලිපිනය sisila.sangarawa@gmail.com වෙත එවන්න.

    ReplyDelete
  8. මමත් ඉඳහිට උදව් කරනවා. මොන කුලකෙට අයිතිද දන්නේ නැහැ

    ReplyDelete

ඔබේ ප්‍රතිචාරය මට සතුටකි!. Your comments are most welcome!
සංයමයෙන් යුතුව ප්‍රතිචාර දක්වන්න.