තවත් ශෝක ප්‍රකාශයක් - Fading memories

අකාලයේ මිය ගිය අපේ බාප්පා සූරියආරච්චිගේ (සරත්) චන්‍ද්‍රසිරි ගේ අවමංගල්‍යයේ දී ඔහුගේ මිතුරෙකු විසින් ලියා පළ කර බෙදා හරිනු ලැබූ ශෝක ප්‍රකාශයක් මා මීට දින කිහිපයකට පෙර පළ කළෙමි.

මේ මිතුරන් පිරිසක් විසින් පළ කර බෙදා හැරුණු එවැනි ම ශෝක ප්‍රකාශයකි.

---

පණ නම් තණ අග පිනි බිඳු වැන්නේ
පරකන්දෙණියේ විසු අප කලණ මිත්
සරත් කුමාර තරුණ මහතාණන්ගේ
හදිසි අභාවප්‍රාප්තිය නිමිත්තෙන් දුක් සුසුම් හෙළන අපි
මෙසේ හඬා වැලපෙමු.

අපගේ නොවක් පියතම හිතවතෙකු ලෙද
දන සිත් දිනාගෙන කටයුතු කරන ලද
හිතවත් සරත් වියොවුණි සදහටම අද
කෙලෙසින් අනේ, සනසාගත හැකිද හද?

ඇසුරට පැමිණි හැමගෙම ආදරය ලැබ
හිත මිතුරනගෙ සිත් කළ හැමවිටම පොබ
සසරෙහි වසන තුරු පිය මිත් සඳුනි ඔබ
අප හා මිතුරු වී ගෙන දෙනු මැනව සුබ

කළ ගුණ හැඳින කටයුතු කළ සියලු සමේ
පැසසුම ලැබී ඔබ හැම දෙනෙකුගෙම ගමේ
හිතවත මිහිර දැනගෙන සිටි මිතුරු පෙමේ
මුළු ගම් පළාතෙම ඔබෙ ගුණ සුවඳ හැමේ

කළ උපකාර දුබලයනට සියලු වෙලේ
ඔබ සිහිවන විට දි දෙනෙතින් කඳුළු සැලේ
පිය මිත් සඳුනි, පෙන්වූ මිත් දහමෙ බලේ
ඔබ ගැන අහෝ හද ඉවසනු බැරිව පාලේ

මිතුරෙක් නොවේ ඔබ ඉටු දෙවියෙකු වැනි ය
මිතුරන් පිරිස අද ඔබ නොමැතිව තනි ය
පැවසූ විහිලු හා රස බස් අම පැණි ය
මොකටද සරත් නොමැතිව පරකන්දෙණිය?

පියතම කලණ මිත සිරිමත දහම රැක
ඉවසා ගන්ට නොහැකිය එන හදෙහි දුක
සදහට මරා මරණය සහ උපත දෙක
සැනසෙනු මැනව අජරාමර නිවන දැක

මේ ශෝකයට පත්,

ජේ. ඒ. අමරසේන	පී. ඒ. විමලසේන
ජේ. ඒ. අබේපාල	ඩබ්ලිව්. ඒ. නන්දසේන
ඩබ්ලිව්. සෝමපාල	ඩබ්ලිව්. ඒ. සෝමපාල
ආර්. ඒ. ඌගිස් අප්පුහාමි

- රසික සූරියආරච්චි

ශෝක ප්‍රකාශයක් - Condolences

අපේ චූටි බාප්පා අකාලයේ මිය ගොස් අවමංගල්‍යය පැවැත්වුණු දා ඔහුගේ මිතුරන් විසින් ලියා මුද්‍රණය කළ ශෝකප්‍රකාශ දෙකක් ඔවුන්, බාප්පාට අවසාන ගෞරව දක්වන්නට එහි පැමිණි ඥාතී හිතමිතුරන් අතරේ බෙදා හැරියා.

මේ ඉන් එකක්.

---

සෝ කඳුළු බිඳෙකි මේ.

පරකන්දෙනියේ විසූ සත්ගුණවත්
සරත් කුමාර චන්ද්‍රසිරි සූරියආරච්චි

මිතුරාගේ අභාවය ගැන මගේ හදපතුලෙන් නැගෙන

කණගාටුවයි මේ.

ලෝනා පහන් ගම් පියසම එළිය කෙරූ
පාළුව රජවෙමින් අප නෙත් කඳුළු පිරූ
හිතවත්කමෙන් ආදරයෙන් සෙනෙහේ දැරූ
අවසන් මොහොත ළංවිය අප නොසිතූ විරූ

මුමුණන විටදි පවනින් කෙඳිරිලි ගීත
දොම්නස නැගෙයි හදවත් කරමින් භීත
නොදනිමි ඔබෙ ගමන සිදුවන බව මෑත
පතනෙමු නිවන් සුව එක්කරමින් දෝත

මිතුරෙකු නොවේ ඔබ මාගේ සොයුරෙක් ය
ඒ ගුණ සුවඳ මුසුකල ගම අඳුරේ ය
ඉපදුන සැමට නියතය යන ගමනක් ය
හිතවත නොමැති මේ ගම මට සොහොනක් ය

බුදු බණ වෙතට මොහොතක් යාකරමි සවන්
සිසිලක් දැනේ එතුළින් දුක කරමි තුරන්
මින්මතු අතනොවී බාධක මරණ මෙවන්
අත්වේවා ඔබට දුක නැති අමර නිවන්

මේ ඔබේ කලණ මිතුරු,

චන්ද්‍රසේන රණසිංහ

---

දැනුත් සමහරවිට මේ ශෝකය ප්‍රකාශකිරීමේ සම්ප්‍රදාය ලංකාවේ අනුගමනය වෙනවා විය යුතුයි.

දෙවෙනි ශෝක ප්‍රකාශය හෙට හෝ අනිද්දා පළ කරන්නම්.

- රසික සූරියආරච්චි

අකාලයේ මියගිය චූටි බාප්පා - Suriyaarachchige Chandrasiri, my father's youngest brother

මේ ඡායාරූපය සූරියආරච්චිගේ චන්ද්‍රසිරිගේ ය. එනම් සූරියආරච්චිගේ ජිනදාස හරිශ්චන්ද්‍ර හෙවත් අපේ තාත්තාගේ බාල ම සොහොයුරාගේ ය.

අප ඔහු ඇමතුවේ "චූටි බාප්පා" යන නමිනි. ආච්චී ඔහු ගැන කතා කළේ "පොඩි කොලුවා" කියාය. ගමේ මිනිසුන් ඔහු ගැන දැන සිටියේ "සරත් චන්ද්‍රසිරි" කියාය. ඔහු සමහර අවස්ථාවල තමන්ගේ නම ලියා ඇත්තේ "සරත් කුමාර් චන්ද්‍රසිරි" කියාය.

පවුලේ බඩ පිස්සා වූ ඔහු අවාසනාවන්ත ලෙස අවුරුදු තිහේ දී තම ජීවිතය හැර ගියේය. මගේ මතකයට අනුව ඒ මොළයේ නහරයක් පිපිරීම නිසා ඇති වූ යේ අන්තඃ මොළ රක්තපාතය නිසාය.

චූටි බාප්පා සාමාන්‍ය පෙළ සමත් වූ අයෙකු යැයි මම සිතමි. ඔහුට යම් ඉංග්‍රීසි භාෂා දැනුමක් ද තිබුණි. මිය යන විට ඔහු සේවය කරමින් සිටියේ කොළඹ කොටුවේ පිහිටි ජුවෙල් ට්‍රේඩ් ඉන්ටර්නැෂනල් නම් ව්‍යාපාරයේය. එහි හිමිකරු වූයේ අද්දර ආරච්චිගේ සැම්සන් නමැත්තෙකි. ඔහු පසු කාලයේ ලංකාවේ ජනප්‍රිය වූ නළුවෙකුගේ පියා ය.

චූටි බාප්පා ඔහුගේ මිතුරන් අතර ජනප්‍රිය චරිතයක් වී යයි සිතමි. නැන්දලාගේ විවාහ උත්සවවලදී ම නිවසේ සිදු කෙරුණු විවිධ කටයුතුවලට ඔහුගේ මිතුරන් පැමිණ උදව් කරනවා මගේ මතකයේ රැඳී ඇත.

බාප්පාගේ අවමංගල්‍ය උත්සවයේදී ඔහුගේ මිතුරන් විසින් කවියෙන් ලියා මුද්‍රණය කරන ලද ශෝක ප්‍රකාශ දෙකක් ද කියවන ලදී.

ඒ ශෝක ප්‍රකාශ කරන්න මම මීලගට පළ කිරීමට අදහස් කරමි.

චූටි බාප්පා සුරා පානය කරනවා හෝ දුම් පානය කරනවා හෝ වෙනත් අකටයුත්තක යෙදෙනවා හෝ මා දැක නැත. ඔහු මකුළුවන්ට සහ කැරපොත්තන්ට පවා බය පුද්ගලයෙකි. එසේ නමුත් ඔහු පරිපූර්ණ මිනිසකු ලෙස ජීවත් වූ අයෙකු යැයි මම නොකියමි. අප සියලු දෙනා මෙන්ම ඔහු ගේ ද යම් යම් වැරදි තියෙන්ට ඇත.

ඔහු මිය යන විට මගේ වයස අවුරුදු දොළහක් පමණ නිසා, චූටි බාප්පා පිළිබඳව මගේ මතකය සීමාසහිත එකකි. එසේ වෙතත් විටින් විට ඔහු පිළිබඳව විවිධ රසවත් කතා මගේ සිතට නැගේ.

ඉදිරි කාලයේ දී ඒවා අකුරු කිරීමට බලාපොරොත්තු වෙමි.

- රසික සූරියආරච්චි