කසුන් හීනටිගල, ශක්තික සත්කුමාර සහ පොලීසියට ආයුධ පෙන්නන්නට යෑම - A long way to go

අර පොලිසියේ අතවරයට ලක් වී ඇති කසුන් හීනටිගල තරුණ පියා ගැන සඳහන් වෙන අපූරු සටහනක් දුටිමි.

එහි පොලිසියෙන් කරන ලද බව කියවෙන කටයුතුවලට විරුද්ධව කතා කරන ගමන් සයිඩ් එකෙන් නිකමට මෙන් කියා තිබුණේ “ඒ වුණාට අනේ කසුන් ඒ කාලේ ලියපු කවි හරි අනුකාරකයි, ඒ එක්කම ඔහු විසින් ලියන ලද පොතෙත් මෙලෝ රහක් නැහැ” කියා ය.

එවිට මට සිහි වූයේ මීට වසර හයකට පමණ පෙර “අර්ධ” නම් කෙටිකතාවක් ලියා ෆේස්බුක් එකේ පළ කිරීමේ වරදට මා මිත්‍ර ශක්තික සත්කුමාර ලේඛකයා දීර්ඝ කාලීන අත් අඩංගුවට පත් වූ අවස්ථාවයි.

එයට විරෝධය පෑමට බොහෝ දෙනෙකු තම තමන්ට හැකි අයුරින් කටයුතු කළහ. මම විරෝධය දක්වන කෙටි සටහනක් ද සමග ඔහුගේ එම කෙටි කතාව මගේ බ්ලොගයේ පළ කළෙමි.

තවත් සමහරු විරෝධය දක්වමින් ලිපි ලිවූහ. ඒ සමගම පිරිසක් එකතු වී විරෝධය පෑමට පුවත්පත් සාකච්ඡාවක් ද සංවිධානය කර තිබුණි.

මෙහි දී මා නිරීක්ෂණය කළ සුවිශේෂී කරුණක් නම් ශක්තික සත්කුමාර අත්අඩංගුවට ගැනීම පිළිබඳව සහ ඒ වෙනුවෙන් වෙනත් කරුණක් සඳහා පනවා තිබුණු නීතියක් අවභාවිතා කිරීම පිළිබඳව විරෝධය දක්වමින් අදහස් ප්‍රකාශ කරන අතර දී සමහර දෙනෙකු “ඒ වුණාට ඔය කියන ~අර්ධ~ නම් කෙටිකතාව නම් එතරම් සාහිත්‍ය රසයක් තිබුණු එකක් නොවේ” යනාදී වශයෙන් සයිඩ් එකෙන් කෝචොක් කිරීමක් ලෙස ද සැලකිය හැකි ප්‍රකාශයක් කිරීමයි.

එයින් ඔවුන් අදහස් කරන්නට ඇත්තේ “අපි ශක්තික සත්කුමාර වෙනුවෙන් පෙනී සිටිය ද ඔහු අප තරම් උසස් ලේඛකයෙකු නොවේ” කියා විය යුතුය.

සිදුව ඇති අසාධාරණයක් ගැන කතාකරද්දී අගතියට පත් වූ තැනැත්තාගේ සාහිත්‍ය නිර්මාණ ගැන විචාරක් කිරීම අත්‍යාවශ්‍ය ද?

අනේ මන්දා?

ඒ සමගම තවත් වැදගත් කරුණක් ද දැඩි කනගාටුවෙන් කිව යුතුය.

එනම්, කසුන් හීනටිගල සම්බන්ධ ප්‍රශ්නයේ දී “ඕකා තමන්ගේ බිරිඳ ගැනයි, මාමණ්ඩිය ගැනයි, විස්කිරිඤ්ඤ ගැනයි පොර ටෝක් දෙන්න ඇති පොලිසියට," යනාදී වශයෙන් පවසා "ඒ නිසා ඔහොම වෙච්ච එක හොඳ වැඩේ” යැයි ඉඟියෙන් පවසන අය සහ මීට අවුරුදු කිහිපයකට පෙර ලංකාව පුරා ව්‍යවසනයක් ලෙස පැතිර ගිය අපරාධ ගැන සැකකරුවන් පොලිසියට ආයුධ පෙන්නන්නට කියා රැගෙන ගොස් මරා දැමීම පිළිබඳව සාධාරණීකරනය කරමින් කතාකළ පුද්ගලයින් අතර යම් සමානත්වයක් ඇති බවයි.

තිස් වසරක යුද්ධයෙන් ද, ඉන්පසු තවත් වසර පහළොවක අනීතික පාලනයකින් ද පීඩාවිඳ ඇති සිත් සතන් සුවපත් වීමට ඒ හා සමාන දිගු කාලයක් වුව ගතවුණොත් එය පුදුමයක් නොවේ.

- රසික සූරියආරච්චි

(image: Generated using Microsoft Designer AI application)