අම්මා විසින් මකුළුදුව පන්සලේ කුස්සියක් සැදීම සඳහා මෙලෙස මුදල් වියදම් කරන්නට ඇත්තේ තාත්තා පරලොව ගොස් අවුරුදු හයක් පමණ ගත වුණු කාලයේ දී ය.
මා දන්නා කාලයේ නම් පස් පව් නොකළ, (මද කලක් දුම් බිව්වේ වුව ද,) තමන්ගේ මත්පැන් කෝටාව ද පුතණුවන් තිදෙනා සඳහා ඉතිරි කර පරලොව ගිය, අපේ තාත්තාට නිවන් යෑමේ අපේක්ෂාවක් තිබුණා යයි මම නොසිතමි. එසේ තිබුණා නම් ඔහු මගේ ජීවිත කාලය තුළ එක් වරකට වඩා පන්සලකට ගොඩවදිනවා මට දකින්නට ඉඩ තිබුණි.
එදින ද ඔහු පන්සල් ගියේ ඒ අපේ බාප්පා මිය ගොස් හත් දවස ගතවීම වෙනුවෙන් හීල් දානය පිරිනැමීමට සිදු වූ නිසාය. තුන් මාසෙ දානය සඳහා සාදුලා ට ආරාධනා කිරීමට තාත්තා නොගිය අතර ඒ සඳහා කඩේ යෑමට සිදුවූයේ මට ය.
තමන්ගේ තරුණ කාලයේ ඊට වඩා පන්සල් යන්නට ඇතැයි සිතිය හැකි තාත්තා පන්සලෙන් දුරස් වී ඇත්තේ, ඔහු මට දැනුම් තේරුම් ඇති කාලයේ ඔහු වටින් ගොඩින් පැවසූ පරිදි, අපේ ගම අසල පිරිවෙනක පැවැති විභාගයක දී එයින් ප්රථම ස්ථානය ලබා ගැනීම පිණිස එක් භික්ෂුවක් විසින් තවත් භික්ෂුවකට ජාපාල ඇට සහිත පානයක් ලබා දුන් සිද්ධියෙන් පසුව ය.
මගේ පියා අයත් වූයේ ගම්බද බෞද්ධ පවුලකට ය. කොටින්ම, මගේ පියාගේ ඥාති සොහොයුරා භික්ෂුවක වූ අතර ඔහු කල්කටා විශ්ව විද්යාලයෙන් ශාස්ත්රවේදී (BA) සහ ශාස්ත්රපති (MA) උපාධි ලබා ලංකාවේ පිරිවෙනක අධිපති තනතුරද හෙබ වූ අයෙකි.
මෙහි දැක්වෙන දිනයට මාස දෙකහමාරකට පසු දිනක අම්මා එකල විසූ නිවසේ පැවැත්වුණු දානයක් අවසානයේ කතාවක් පැවැත්වූ පන්සලේ සාදු විසින් අම්මා කළ මෙවැනි දේ සඳහා ඇගේ පුතණුවන් තිදෙනාගේ ආධාරය ද ලැබෙන්නට ඇති බවට ඉඟි කළ විගසම මා එම කතාවට බාධා කරමින් වහාම පැවසූයේ මගේ නම් කිසිදු සම්මාදමක් නැති බවයි. මල්ලිලා දෙන්නා ද මේ කටයුත්තට කිසිදු සම්බන්ධයක් නොතිබුණේ යැයි මම සිතමි.
එදින සවස් යාමයේ මගේ බාලම සොහොයුරා මා සමග පැවසූයේ මෙම මුළුතැන් ගෙය ඉදිකරන ලද්දේ පන්සලේ රාත්රියට නතර වෙන ඩ්රයිවර්ලා කොන්දොස්තරලා වැනි අයට කෑම පිස ගැනීම සඳහා බවය.
මෙම පුවරුවේ ඇති සටහනේ අඩුවක් ඇත.
එනම් අර නන්දාරාම නම් සාදුට යොදා ඇති ශ්රාස්ත්රවේදී යන උපාධි නාමය මගේ තාත්තා ගේ නමට ඉදිරියෙන් ද යෙදිය යුතුව තිබුණි. මම හිතන විදියට මේ සාදු උපාධිය ලබාගන්න ඇත්තේද මගේ පියා උපාධිය ලබාගත් විද්යෝදය විශ්වවිද්යාලයෙන් විය යුතුය.
මේ පන්සලේ වැඩකිඩ ගැන දුක හිතෙන කතාවක් මෙතැනින් කියවිය හැකිය. වෙස්සන්තර නම් ආත්මාර්ථකාමියෙකි, එතකොට සුමනාවතී? - I dont get this!
https://rasikalogy.blogspot.com/2016/04/i-dont-get-this.html
- රසික සූරියආරච්චි (image: අම්මා හෝ මල්ලී හෝ විසින් 2017 දී මවෙත එවන ලදී.)
