සූරියආරච්චිලාට "සූරිය" බලය - Solar power rules

නම සූරියආරච්චි වුණාට ඒ "සූරිය" බලයෙන් මුලින්ම ප්‍රයෝජනයක් ගන්න මට ලැබෙන්නේ හෙටයි.

අපි මේ නිවසට ගෙවැදුනේ 2012 අවුරුද්දේ පෙබරවාරි මාසයේ දී. ඒ දවස්වල ඉඳලම වාගේ විටින් විට නිවසට සූර්ය විදුලි බල පද්ධතියක් සවිකර ගන්න සොයා බැලුවාට ඒක දිනෙන් දිනම කල් ගියා.

ඒකට මූලික හේතුව වුණේ සූර්ය බලය නිපදවන දිවා කාලයේ අපේ ගෙදර විදුලි භාවිතය අවම නිසා අපිට ඒ කරන ආයෝජනයෙන් ලොකු වාසියක් නැතිවීම. අපි විදුලි බලය වැඩියෙන් ම භාවිතා කරන්නේ ශීත කාලයේ රාත්‍රියට ගෙය උණුසුම් කරන්න සහ, ග්‍රීෂ්ම කාලයේ රාත්‍රියට ගේ සීතල කරන්නයි. එනිසා අපි සොයා බැලුවේ විදුලිය ගබඩා කර ගත හැකි බැටරියක් ද ඇතුළත් සූර්ය විදුලි පද්ධතියක්.

මගේ මතකයට අනුව අවුරුදු දොළහකට විතර කලින්, සාමාන්‍ය 6 kW සූර්යය පැනල පද්ධතියක් සවි කරගන්න ඩොලර් හයදාහකින් විතර පුළුවන් වුණාට, ඒකට සරිලන බැටරියක් එකතු කළාම වියදම ඩොලර් විසිදාහක් දක්වා වැඩිවුණා. ඒ කාලේ ඩොලට් 20,000 කියන්නේ ලොකු ගාණක්.

නමුත් පහුගිය අවුරුදු කිහිපය තුළ ඒ වාතාවරණය වෙනස්වුණා.

එක වෙනසක් තමයි දිවා කාලයේ අපේ නිවසේ විදුලි පරිභෝජනය වැඩිවීම. ඊළඟට, අනිත් බඩු භාණ්ඩ හැම එකකම මිල ඉහළ යද්දී, රජයෙන් ලැබෙන දිරි දීමනා යනාදිය නිසා සූර්ය පැනල සහ විදුලි කෝෂවල මිල කාලයට සාපේක්ෂව අඩුවීම.

ඉතින් මාර්තු මාසයේ දී විවිධ විකල්ප සූර්ය විදුලි බල පද්ධති සැලසුම් සංසන්දනය කර බලා, අපි මේ පළාතේ තිබෙන පාරිභෝගික ප්‍රසාදය දිනාගත් සමාගමක් සමග කොන්ත්‍රාත්තුවක් අත්සන් කළා.

මේ කාලයේ ඕස්ට්‍රේලියාවේ කොතරම් නිවාස සංඛ්‍යාවකට සූර්ය විදුලි බල පද්ධති සවිකරනවා ද කියනවා නම් අපිට දිනය ලැබුණේ මැයි මාසයේ 19 වැනිදාට එනම් හෙට දවසටයි.

මෙන්න හෙට සවිකරන අපේ සූර්ය බල පද්ධතිය පිළිබඳ කෙටි විස්තරයක්.

AIKO Solar Neostar 2S (510W) පැනල් 23 = 11.73 kW

Sigenergy SigenStor-10T-32 ඉන්වර්ටරය 9.99 kW

Sigenergy SigenStor බැටරි පද්ධතිය = 32.24 kWh

ජූනි-ජූලි-අගෝස්තු මාස තුන තමයි අවුරුද්දේ හිරු රශ්මිය අඩු ශීත සමය. ඒ කාලයේ සාමාන්‍යයෙන් දිනකට ඒකක (kWh) 20 - 25 වගේ නිපදවේවි ය කියායි බලාපොරොත්තුව. නමුත් ඒ කාලයේ අපේ දිනක පරිභෝජනය ගිය වසරේ දත්ත අනුව ඒකක 40 ක් පමණ වෙනවා.

එනිසා ඉතුරු මාස නමයේ නම් අපිට තනිකරම මේ සූර්ය විදුලි බල පද්ධතිය මත යැපෙන්න හැකිවේවි කියායි මම හිතන්නේ. වැඩිපුර නිපදවෙන විදුලිය විදුලිබල ජාලයට විකුණලා තුට්ටු දෙකක වාසියක් ගන්නත් හැකිවේවි.

තුට්ටු දෙකක් කිව්වේ වැරදිලා නොවෙයි. දැන් විදුලි ඒකකයක මිල ශත 32 ක් වුණාට, නිවසේ නිපදවෙන සූර්ය විදුලිය ජාලයට දුන්නාම පාරිභෝගිකයින්ට ලැබෙන්නේ ශත හතරක් පමණයි. ඒ කියන්නේ තුට්ටු දෙකකට වඩා ශතයයි වැඩි.

- රසික සූරියආරච්චි