අනවශ්‍ය පරිදි කල් අදිමින් සිට, ගංවතුර නහයටත් වඩා උඩින් ගිය පසු වුවද, දැන් ඉතින්
රන්වල ප්‍රශ්නය අප බලාපොරොත්තු වූ ආකාරයටම විසඳී ඇති බව පෙනී යන නිසා මේ දෙසැම්බර් 13 වැනිදා සවස් යාමයේ මෙය ලියා පළ කර යුතු ම යයි සිතමි.
තමන්ට ආචාර්ය උපාධියක් හෙවත් ඩොක්ටරේට් එකක් හෙවත් PhD එකක් ඇති ඇයි සැලකෙන ප්‍රකාශ නිකුත් කරන විට නිහඬව සිටිමින් වක්‍රාණුකාරයෙන් ඒවා අනුමත කරමින් අශෝක රන්වල ස්වයං ඝාතනයක් කරගත්තේ ය.
නමුත් එයින් ම අප වටහා ගත යුතු අනිත් කාරණය නම් ඔහුට ඔහුට එවැනි උපාධියක් හෝ එවැනි සුදුසුකමක් නොතිබුණු බවයි. එසේ තිබුණා නම්, එවැනි උපාධියක් ලබා ගැනීම පිළිබඳ ඔහුට අවබෝධයක් තිබිය යුතුය. එනිසා ම, තමන්ට එවැන්නක් නොමැති බව අතැඹුලක් සේ වැටහිය යුතුය.
මට දැනගන්නට ලැබුණු ආකාරයට අවසාන මොහොතේ ද ඔහු පවසා තිබෙන්නේ "මට අහවල් විශ්වවිද්‍යාලයෙන් අහවල් කාරණය සඳහා පී.එච්.ඩී, එකක් ලැබීමට නියමිතව තිබුණා, නමුත් ඒ සහතිකය තවම ලැබී නැත", හෝ අන්න ඒ ආකාරයේ වෙනත් දේ බවයි.
මා මේ සටහන ලියන්නට පටන් ගත්තේ රන්වල ගැන ලියන්නට නොවේ වෙනත් මා හොඳින් දන්නා කාරණයක් ගැන ලියන්නටයි.
එනම්, සමහර පුද්ගලයින් අශෝක රන්වල පත්වූ ආකාරයේ අසීරු අවස්ථාවලට පත්වන්නේ ඔවුන්ගේ වරදක් නිසා නොව, ඔවුන්ගේ මිතුරන්වන හෝ ඔවුන්ගේ යහපත ගැන සිතන, කාරුණික හදවත් ඇති නිසාම අනවශ්‍ය දුරකට ගොස් සහයෝගය දැක්වීමට උත්සාහ කරන පුද්ගලයින් නිසා බවයි.
මෙන්න ඒ පිළිබඳව මගේ හොඳ අත්දැකීමක් ඇති කතාවක්.
මා ඉතා හොඳින් දන්නා තම මූලික උපාධියෙන් පසු පශ්චාත් උපාධි මෙන්ම හෙවත් ආචාර්ය උපාධියක් ද ලැබු අයෙකු සිටී. ඔහු මේ කියන කාලේ විශ්ව විද්‍යාලයක සේවයට කළේ ජ්‍යෙෂ්ඨ කථිකාචාර්යවරයෙකු ලෙසිනි.
ඒ දිනවල පළ වූ ප්‍රකාශනයක, මෙය ඇත්තෙන්ම සමරු කලාපයකි, ඔහුගේ නම ඉදිරියෙන් "මහාචාර්ය" යන පදවිය යොදා තිබෙනු මා දුටුවෙමි.
මේ කියන මගේ මිතුරා ජ්‍යෙෂ්ඨ කථිකාචාර්යවරයෙකු බව මා හොඳින් දන්නා නිසා සමරු කලාපය නිෂ්පාදනය කිරීමට අදාළ ව්‍යාපෘතියේ කළමනාකරුගෙන් මම මේ පිළිබඳව විමසීමි.
ඇත්තටම මා මුලින්ම සිතුවේ මගේ මිතුරා ජ්‍යෙෂ්ඨ කථිකාචාර්ය තනතුරෙන් මහාචාර්ය තනතුරට උසස්වීමක් ලබා ඇති සේය. ඔහුට එම උසස් වීම පිළිබඳව සුබ පැතුම් පණිවිඩයක් යැවීමට ඔහුගේ විශ්වවිද්‍යාල වෙබ් පිටුවට ගිය විටයි මා දුටුවේ ඔහු තවමත් ජ්‍යෙෂ්ඨ කථිකාචාර්යවරයකු බව.
සමරු කලාපය සෑදූ පුද්ගලයා මා සමග කීවේ අපූරු කතාවකි.
"මං තමයි ඒ Professor කියන නම එකතු කළේ. දැන් අපේ යාලුවා ෆොෆෙසර් වෙන්න කාලය එළඹිලායි තියෙන්නේ!"
හොඳ වෙලාවට ඒ සමරු කලාපය වැඩිදුර සංසරණය වූ එකක් නොවිණි.
එසේ නොමැති වූවා නම්, අපේ ජ්‍යෙෂ්ඨ කථිකාචාර්ය මිතුරාට මහා අබැද්දියක්ට මුහුණ පෑමට සිදුවෙනවා නියතය.
මන්ද යත් අද, අවුරුදු පහළොවකට පසුව ද ඔහු ජ්‍යෙෂ්ඨ කථිකාචාර්යවරයෙකු බැවිනි.
මෙහිදී මතක් කළ යුතු වැදගත් කරුණක් ඇත. ජ්‍යෙෂ්ඨ කථිකාචාර්ය මෙන්ම, සහාය මහාචාර්ය සහ මහාචාර්ය යනු රැකියා නාම වේ.
ඒවා වැදගත් වන්නේ විශ්ව්විද්‍යාලය ඇතුළේ ය. ගෙදර ගිය විට, ගොස් කවියක් ලියනවිට, ව්ශ්‍රාම ගිය විට, ඒවා අදාල නැත.
- රසික සූරියආරච්චි
ප/ලි:
තවත් කතාවක් ඇත, එය මෙහි ප්‍රතිවිරුද්ධ පැත්තේය. පසුව ලියමි.
(image: AI generated)
