Monday, 23 May 2016

හති වැටෙන කල් කිස් කිරීම - Time to slow down


කිස් කිරීමට කෙළින්ම අදාළ වුවත්, බ්ලොග් ලිවීමට කෙළින් ම අදාළ නැති, මේ වංකගිරි කතාව පොඩි කාලේ මතකයන් ඇසුරෙන් මගේ සිතට හදිසියේ කඩා වැදුණේ බ්ලොග් ලිවීම ගැන ම සිතමින් සිටිද්දී ය.

මා පොඩි කාලයේ ඇසූ බයිලාවක පද දෙකක් මෙසේ විය.

මේ ගායිකාව ගේ බයිලාවකි.
ඉෆ් යූ වොන්ට් ටු කිස් මී ඩාර්ලින් ඩූ නොට් කම් ඇට් සික්ස්
මමා විල් බී ඇට් ද ගේට් විත් එ බෲම් ස්ටික්

තමන්ව කිස් කිරීමට හෙවත් උම්මා කිරීමට හෙවත් තමන්ට චුම්බනයක් දීමට අවශ්‍ය නම්, නිවසට පැමිණිය නොයුත්තේ කුමන හෝරාවේ දැයි ඇය මේ අච්වුවේ ම පද දෙකේ කොටස් හරහා දිගින් දිගට ම ඇදෙන මේ වැල් බයිලාවෙන් තම පෙම්වතාට කියයි. මේ ගීතයේ ඒ දෙපදය හැර අන් කිසිදු පදයක් මට නිවැරදිව සිහි ගන්වා ගත නොහැකිය. නමුත්, අවසාන පද යුගල හැර අන් හැම පද යුගලයක ම මුල් පදයෙන් කියවෙන්නේ අහවල් හෝරාවේ නොපැමිණෙන්න කියාත්, දෙවෙනි පදයෙන් එසේ නොපැමිණිය යුත්තේ ඇයි ද කියාත් ය. ගායිකාව ඒ නොපැමිණ සිටිය යුතු යැයි කීමට හේතු වන්නේ "මමා" සිටි ආකාරයට ම එක්කෝ "පපා" හෝ නැතිනම් අන් අයෙකු හෝ, යම් ගෘහස්ථ භාණ්ඩයකින් ආම්පන්න වී දොර ළඟ ආරක්‍ෂාවට සිටීමයි!

මේ බයිලාව අවසාන වන්නේ කිසිදු බාහිර උපද්‍රවයකින් හෝ කරදරයකින් තොරව අනිවාර්යෙන් ම ඇයව කිස් කිරීමට හෙවත් උම්මා කිරීමට හෙවත් ඇයට චුම්බනයක් දීමට නම්, ඔහු පැමිණිය යුත්තේ කුමන හෝරාවටදැයි පෙම්වතාට නිවැරදිව පැවසීමෙන් යැයි සිතමි.

කිස් දීම පිළිබඳවම තවත් සිංහල බයිලාවක් ද ඒ දිනවල ජනප්‍ර්‍රිය විය. මෙය ගායනා කරන ලද්දේ ජිප්සීතස් කණ්ඩායමයි. ුය ද වැල් බයිලාවක් ම වූ අතර, සෑම පද යුගලක් ම පහත අච්චුවේ විය.
මම දුන්නෙ කිස් එකයි, කිස් එකයි
මම දුන්නෙ කිස් එකයි, කිස් එකයි
මම දුන්නෙ කිස් එකයි, හැබැයි ඒ්ක මුල් එකයි
ඉතිං දුන්න තව එකක් දැන් දෙකයි
එපා යන්න තවත් දෙන්න
ඇඟේ වෙලි වෙලි ඈ යළි යළි පවසයි

ජිප්සීස් ලා ගේ ඉහත බයිලාව අවසන් වන්නේ කිස් දහයක් පමණ දීමෙන් පසුවද අනේ තවත් දෙන්න යැයි ඉල්ලන පෙම්වතියට "මට දැන් හති අදට ඔපමණයි" කියා පෙම්වතා කීමෙනි.

කිස් දහයක් දීම තියා, කෙල්ලක ගේ අතින් අල්ලා හෝ නැති කොලු කුරුට්ටන් අතර ජිප්සීස්ලා ගේ ඒ බයිලාව අති ජනප්‍ර්‍රි වීම කිසිසේත් ම පුදුමයක් නොවේ.

මා සිතන විදියට නිහාල් නෙල්සන් පහත බයිලාව කියුවේ ජීප්සීස්ලා ගේ කිස් බයිලාවට පිළිතුරු ලෙසිනි.
ඩෙන්න ඩෙනා ඩෙන ඩෙන ඩෙන ඩෙනා ඩෙනෝ
දෙන්න ගිහින් කිස් දහයක් කොල්ලෙකු කිච වුණෝ

මගේ මතකයේ හැටියට එතැන් සිට කියවුණේ මුල් කිස් එක දෙන්නට ගොසින් කනේ පාරක් කෑ බවත්, දෙවැනි කිස් එකට ලැබුණේ කම්මුල් පාරක් බවත් යනාදී වශයෙන් කිස් දහය අවසාන වෙන තුරු ඇදෙන වැල් බයිලාවකි.

හින්දි ගීයක තනුවකට අනුව සැකසුණු ජෝතිපාල ගයන "කිස් නම් හාදුව වේ, ආශාවන් පිබිදේ" නම් වේග රිද්ම ගීයක් ගැන මද මතකයක් ඇති නමුත්, ඒ පිළිබඳව ඊට එහා යමක් සොයා ගත නොහැකි විය.

මේ වැල්-බයිලා සියල්ල මට සිහිවුනේ ඇයිදැයි කීමට මේ හොඳම වේලාවයි.

මා නිවසෙන් බැහැරව නිවාඩුවක් ගත කරමින් සිටි අප්‍රියෙල් මාසයේ මැද දිනයක, 2015 වසරේ දී ඉන්දික කොඩිතුවක්කු සහ දුෂාන් කුරුවිට ගේ මූලිකත්වයෙන් ඇරඹි, බ්ලොග් වසන්තය නම් වැඩ සටහන මේ වසරේ ද මාසයක් පුරා ක්‍රියාත්මක වන බව කියවන්නට ලැබුණි.

ඉතිං, සුවච කීකරු බ්ලොග්කරුවෙකු ලෙස මා අප්‍රියෙල් 22 දා සිට කළේ දිනපතා ම වාගේ රසිකොලොජියේ ලිපි පළ කිරීමයි.

දැන් මාසයක් ම ගෙවී ගොස් ඇත. මේ මා ලියන්නේ 2016 බ්ලොග් වසන්තයේ 27 වෙනි ලිපියයි!

මට දැන් කියන්නට අවශ්‍ය වන්නේ අර ජිප්සීස්ලා ගේ "මම දුන්නෙ කිස් එකයි" වැල්-බයිලාවේ අවසන් පදයේ සංස්කරණයකි.

මට දැන් හති දැනට ඔපමණයි!

බ්ලොග් වසන්තයට ආයිබෝවන්.

-රසිකොලොජිස්ට්

(image: http://ticketcrusader.com/kiss-presale-passwords/)

13 comments:

  1. වසන්තයා නරක නැත.
    කොටින්ම අවුරුද්දෙ මුල් මාස තුනේ ලිව්ව වගේ තුන් ගුණයක් විතර ලිව්ව ඒ නිසා. මාත් ටිකක් නිදාගන්න ඕන.

    ReplyDelete
  2. රසික පුතා "කිස්" ගැන අද ලියා ඇතේ
    මේවා තමා රට වැනසෙන කතා පුතේ
    වෙසක් පොහොය පහු වී වැඩි කලක් නැතේ
    සංකර කතා මේ කාලෙම මොටද පුතේ

    උතුරින් දෙමළාය හම්බයා නැඟෙනහිර
    මුන් දෙන්නාම දියුණට අපෙ කරති මර
    සිංහල දරු කැලත වටහා මගෙ වදන
    රට ජාතිය රැකුමට ගත යුතුය පෙරමුණ

    මීට, කුමාර අන්කල්

    ReplyDelete
  3. රසිකලා කරන්නේ මේ කිස් කිරීම වැනි නව ලිබරල්වාදී මතයන් සමාජ ගත කිරීමයි...

    කරුණාකර ගං වතුර ගැන පමණක් ලියන්න..

    මීට Wmk Samarasekera මයා....

    ReplyDelete
  4. කිස් ගොඩාක් දෙන්න ගිහිල්ල ඇණගත්ත කුමාරියෙක් තමා මේ


    පට්ටිපාලක

    ReplyDelete
  5. The Rock Band KISS and the Death Instinct

    http://www.lankaweb.com/news/items/2010/12/31/the-rock-band-kiss-and-the-death-instinct/

    ReplyDelete
  6. එසේ මෙසේ සපෝට් එකක් නෙමේ වසන්තයට දීලා තියෙන්නේ.

    කිස් නම් හාදුවකි සුජීවා ෆිල්ම් එකේ. කරු අබේසේකර ලියලා තියෙන්නේ. ඔය සින්දුව ගුවන් විදුලියේ වාරණය කරලා තියෙනවා කිස් කියන වචණේ තියෙන නිසා. එහෙමයි මම අහලා තියෙන්නේ. හැබැයි ඒකේ හාදුව තියෙනවා. කිස් එකට එදත් කැපිල්ල. අරාබියෙ නම් අදත් කැපිල්ල.

    ReplyDelete
    Replies
    1. උඹ ඉන්න දේශයේ අවුලක් නෑ නොවැ.

      Delete
  7. රසික, මම කිව්ව වගේ මේ පාරත් රෙකෝඩ් එක රසිකගෙ.

    ඇත්තටම මෙවර වසන්තයාට හිතුවාට වඩා ප්‍රථිව්චාර තිබ්බ. ඒත් අග පොඩ්ඩක් ඕලාරික වෙලා ගියා අපිට වෙච්චි පුද්ගලික ලකලන්චි කීපයක් නිසා, මේ වැඩේට යොදවපු කාලය අඩුවුනා ඒකෙන් අර තිබ්බ ගැම්ම අඩු උනා වගේම ආපු ගං වතුරත් එක්ක තවත් ටිකක් බැස්ස.

    නමුත්, අපි පොරොන්දුවුන විදිහටම වැඩිම ඡන්ද හිමියන්ට ත්‍යාගත්, මේ වැඩේ සාර්ථක කරගන්න උදව් කල සැමට අවංක ස්තූතියත් පිලිගන්වනවාමයි.

    රසිකගේ හාදුවට සහ වසන්තයට කදිමට කැපෙන මේ දුලබ ගීය ගැයුවෙ නිර්මලා රණතුංග.


    පියාඹා එන හාදුවක් අද පියාපත් විදහා
    එතෙර සිට ගව් ගනන් ගෙවලා
    මහ සයුර හැරලා

    ලඟවිය නොයෙනා මලෙකි ඔබ
    පුරා තහනම් දිනෙක සුපිපුනු
    මෙතෙර සිටියත් එතෙර සිටියත්
    පියාපත් ලද යුතුය හාදුව

    නපුරු නොදැමුනු අයවුලුන් ලෙස
    ලොවෙන් කොන් කර සිටිමු අප අද
    දැහැමි වෙස් ගෙන සිටින මිනිසුනි
    කියව් අප කල වරද තොප හට

    ReplyDelete
  8. වසන්තයත් එහෙනම් නරකම නැහැනේ. එහෙනම් මේ කිස් එක වසන්තයට කියලා අපි හිතාගමු.

    ReplyDelete
  9. අන්න ඒකයි වසන්තය කියන්නෙ..
    ජයවේවා..!!

    ReplyDelete
  10. ඩේන්න ඩේනා ඩේන ඩේන ඩේන ඩේන්න ඩේනා ඩෙනෝ දෙන්න ගිහින් කිස් දහයක් කොල්ලෙක් නැති උනෝ.../// නිහාල් නෙල්සන් කිව්වා මතකද?

    ReplyDelete

ඔබේ ප්‍රතිචාරය මට සතුටකි!. Your comments are most welcome!
සංයමයෙන් යුතුව ප්‍රතිචාර දක්වන්න.