Friday 10 April 2015

ග්ලෙන්මෝ පාක් නමැති මගේ ඕස්ට්‍රේලියානු ගම (හුදෙක් ම වාර්තාවක් පමණි) - Grass for my feet


මා ජීවත්වෙන්නේ ඕස්ට්‍රේලියාවේ, නිව් සවුත් වේල්ස් ප්‍රාන්තයේ, පෙන්රිත් නම් නගර සභා ප්‍රදේශයේ පිහිටි ග්ලෙන්මෝ පාක් නමැති ගම්මානයේ ය.

මෙය මා ගම්මානයක් යැයි හැඳින්වූව ද සැබැවින් ම කිව යුත්තේ තදාසන්න ප්‍රදේශයක් හෙවත් සබර්බයක් ලෙසිනි. නමුත්, මනරම් උද්‍යාන, ජලාශ, වාහන සඳහා ද, පයින් යන්නන් සඳහාද මාර්ග සහිත, උතුරු පසින් අධිවේගී මාර්ගයකටද, දකුණු පසින් කුඩා වන පෙදෙසකට සහ වගාබිම් කිහිපයකට ද, අනිත් දෙපසින් මහා මාර්ග දෙකකටද මායිම් වූ මේ ප්‍රදේශයේ ඇති සරල සුන්දර බව නිසාම එය ගමක් ලෙස මිස නගරාසන්න පෙදෙසක් ලෙස බොහෝ විට නොසිතෙයි.

මෙහිදී බොහෝ විට යනුවෙන් මා අදහස් කළේ උදෑසන සහ සවස් වරුවේ දුම්රියපොළට යාමට සහ ඒමට මෝටර් රථයෙන් යනෙන අවස්ථාවන් අතහැර බව සලකන්න. මේ දිනවල අපේ උදෑසන අපේ ගමෙන් පිටවීමට ද, සවස ගම කරා ඒමට ද වාහන පෝලිම සැරටම පවතී!

බටහිර ඕස්ටේ‍ර්ලියාවේ අගනුවර වෙන පර්ත් නගරාසන්නව වෙසෙන සිංහල කවියෙකු වර්ග කිලෝමීටර් 6,500 ක වපසරියකින් යුතු, මිනිසුන් මිලියන දෙකක් පමණ ජීවත්වෙන ඒ පර්ත් නුවර හඳුන්වන්නේ පර්ත් ගම යනුවෙන් බව සලකන කල, වර්ග කිලෝමීටර් 8.3 ක් විශාල, විසි දහසක ජනගහණයකින් යුතු මා වසන ග්ලෙන්මෝ පාර්ක් ප්‍රදේශය ගම්මානයක් යැයි සැලකීම අරුමයක් නොවේ.



මා අසා දැන ඇති පරිදි ග්ලෙන් යන ස්කොට්ලන්ත වචනයෙන් අදහස් වෙන්නේ කුඩා නිම්නයක් හෝ කුඩා දියපහරක් ගලා යන ප්‍රදේශයක් යන්නයි. වත්මන් ඕස්ට්‍රේලියාවේ යූරෝපීය පසුබිම නිසා, ග්ලෙන් යන්නෙන් ඇරඹෙන ප්‍රදේශ නාම සිය ගණනක් මෙහි ඇත.

එසේම, මෙය ලංකාවට නුහුරු නමක් ද නොවේ. උදාහරණයක් ලෙස, මගේ බිරිඳ ගේ ලංකාවේ මහගෙදර පිහිටා තිබුණේ "ග්ලෙන් ෆෝල් පාත්" නමැති මාවතකයි. කඳු මුදුන්වල වනාන්තර විනාශ කිරීම නිසා පසු කලෙක මුළුමනින් ම වාගේ සිඳී යන්නට පෙර ඒ මාවත ඇදී ගියේ "ග්ලෙන් ෆෝල්" නමින් හැඳින්වුනු දිය ඇල්ලක් දෙසටයි.

ග්ලෙන්මෝ පාර්ක් ගම්මානය තුළ වෙසෙන ළමුන් සඳහා ප්‍රාන්ත රජයෙන් පාලනය වෙන ප්‍රාථමික පාසල් දෙකක් ද, ද්වීයිතික විද්‍යාලයක් ද පිහිටා ඇත. මීට අමතරව, රජයෙන් ආධාර ලබන නමුත් කතෝලික පල්ලියෙන් පාලනය වෙන ප්‍රාථමික පාසලක් සහ ද්වීයිතික විද්‍යාලයක් ද වේ. මගේ පුතා වසර පහක් ඉගෙනුම ලැබුවේ ඉහත ප්‍රාථමික පාසල් අතුරෙන් අපේ නිවසට ලඟින්ම පිහිටා ඇති ප්‍රාථමික පාසල වූ ග්ලෙන්මෝ පාක් මහජන පාසලේ ය. රජයෙන් පාලනය වෙන මේ මහජන (හෙවත් පබ්ලික්) පාසල් නිර්-ආගමික වේ. ඒ ගැන වැඩි විස්තර පසුවට තබමි.

මා මේ ගම්මානයේ පදිංචියට ආවේ වසර 2002 ඔක්තෝබරයේ දී ය. අපේ ජීවීතවල සිදු වූ යම් යම් වෙනස්කම් නිසා අප සිව් දෙනා, මෙල්බරන් තදාසන්නයේ සිට මේ ප්‍රදේශයට පැමිණියේ ඊට වසරකට පමණ පෙරදී ය. එතැන් සිට, මේ ගම්මානයේ පදිංචියට ඒමට පෙර, අප වසරක පමණ කාලයක් වාසය කලේ මීට කිලෝමීටර් හයක් පමණ දුරින් පිහිටි කිංග්ස්වුඩ් නම් ප්‍රදේශයේයි.

මා මුලින් කී විවිධ කරුණු නිසා කිංග්ස්වුඩ් හා සසඳන විට අපේ ග්ලෙන්මෝ පාක් ගම, සෑබෑ ගමකි. මෙහි මාර්ග සියල්ලම සාදා ඇත්තේ දෙපසටම වංගු සහ වෙනත් මාර්ගයකට සම්බන්ධ නොවී නිවෙස්වලින් ම අවසන්වන කෙටි මාර්ග රාශියකින් යුක්තවය. වංගු පාරවල්වල වාහනය නිදැල්ලේ පදවන සැම විටම පාහේ දැනෙන්නේ ඉමහත් ප්‍රීතියකි.

අප ග්ලෙන්මෝ පාර්ක් හි පදිංචියට ආ මුල් කාලයේ බිරිඳත්, මාත් දෙදෙනා ම සේවය කළේ මේ ප්‍රදේශයේ ම ය. නමුත් දැන් මා සේවය කරන්නේ අපේ ගමෙන් කිලෝ මීටර් හැට හයක් පමණ දුරින් ඇති සිඩ්නි නගරයේ උතුරු කෙළවරේ ඇති කාර්යාලයක ය. එනිසා දිනපතා නිවසේ සිට කිලෝ මීටර් අටක් පමණ දුර ගෙවා දුම්රිය ස්ථානයට ගොස් එතැනින් දුම්රියක පැයයි විනාඩි පහළොවක් පමණ කල් ගත කොට නගරයේ පිහිටි කාර්යාලයට යාමට මට සිදුවී ඇත.

ගමනට කෙතරම් කාලයක් ගත වුණ ද, මේ ගම හැරදා සිඩ්නි නගරයට වඩා කිට්ටු ප්‍රදේශයක පදිංචියට යාමට නම් මම නො පතමි.

නිවස කිට්ටුව ඇති පෙන්රිත් නම් නගරයේ රැකියාවක් සොයා ගැනීම ඊට වඩා හොඳ විකල්පයයි. මක් නිසා ද යත්, බිරිඳ සේවය කරන්නේ ද, පුතා පාසල් යන්නේ ද පෙන්රිත් නගරයේ හෙයිනි!

-රසිකොලොජිස්ට්

(මෙය බ්ලොග් වසන්තය වෙනුවෙන් ලියවුණු ලිපියකි!)

(images: Google maps & http://www.parkviewglenmoreridge.com.au/)

31 comments:

  1. ඔය ගමේ පාරවල්වල අන්දයින් සඳහා වෙන්වූ ගැටි සහිත පදික තීරු (Tactile paving) තිබේද?
    ජපානෙ නම් දැන් හැම පාරකම වගේ දාල තියෙනවා.
    ඒකත් මූලික මානව හිමිකමක්.

    ReplyDelete
    Replies
    1. ඔය විශේෂ ඇතුරුම් තියෙනවා ගමේ කඩ මංඩියේ සහ නගරයේ නම්. අපේ ගමේ බොහෝ පාරවල් අසල ඇවිදින මං තීරු තිබුණත්, ඒවායේ අන්ධ අය ඇවිදීමක් නෑ. නගරයට දුරින් සිට අන්ධ අයෙකුට ගයිඩ් බල්ලෙකු සමග ජීවත් වීම අමාරුයි.

      Delete
  2. 'ග්ලෙන්' නම් මෙහෙ වැහි වැහැල නේ. මම වැඩ කරන පැත්තෙත් 'ග්ලෙන්' කෑල්ලක් තියෙනවා. එකදාස් අටසිය ගණන්වල තියෙන්න ඇති glen එකක්.

    ReplyDelete
    Replies
    1. ලන්කාවෙනම් සමහර ග්ලෙන් ----- ඒව නම් කරල තියෙන්නෙ ඒවා ග්ලෙන් හෝ කුඩා නිම්න නිසාම නෙමෙයි. පයනියර් වැවිලිකරුවන් හුඟක් ස්කොටිෂ් අය වුන නිසා ඔවුන් තමන්ගේ ගම් ප්‍රදේශයේ නම් තමන්ගේ ලංකාවෙ වත්තට හෝ වත්තේ කොටසකට දැම්ම. ලංකාවෙ තේවතු විශාල ප්‍රමාණයකට ස්කොට්ලන්ත ස්ථාන නාම තියනව. උදා- ග්ලෙන් ඇල්පින්, කලන්, ග්ලෙනනෝර්

      Delete
    2. මං කැමතිම ග්ලෙන් ජාතිය මෙන්න:

      Glenfiddich

      !!!

      Delete
  3. අපේ රටේ ඉඩං වෙන්දේසි කාරයෙක් මේ නම දැක්කොත් කොහේ හරි පට්ට කැලයක් මැද ඉඩමක් එලි කරලා බොරළු පාරවල් ටිකක් දාලා පර්චස් පහේ කෑලි කඩලා ග්ලෙන්මොර් පාර්ක් කියලා ඒකට නම දානවාමයි

    ReplyDelete
    Replies
    1. හොරණ ඉංගිරිය පාරේ තියෙනවා නේද පර්ත් සිටි කියලා වෙන්දේසි වත්තක්. ඉස්සර එතැන ලස්සන රබර් වත්තක් තිබුණේ!

      Delete
    2. පර්ත් කියන්නෙ ඒ වත්තෙ නම. ඉන්දියන් සමාගමක් ඒක කට්ටි කරලා, ඒ වගේ පිළිවළකට හදලා විකිණුවා පර්ත් පැරඩයිස් නමින්. ඒකත් කුඩා ගමක් තමයි. ඔය කියන ගම වගේම ...ඒත් දැන් නඩත්තුවක් නෑ.

      Delete
  4. විකුණන ඉඩමකට කියාපු නම.

    ReplyDelete
    Replies
    1. මේක මුළු ගමම කාළෙකට ඉස්සර ගෙවල් දෙකක් විතරක් තිබුණු වගා බිම් දෙකක්. අපේ ගෙදර තිේ‍රන හරිය කෑලි කඩලා විකුණුවේ දැන් අවඑරුදු හතකට විතර ඉස්සර.

      Delete
  5. රසික....................

    මීට ගැලපෙනම මගේ ඊයේ ජයග්‍රහණය ගැන කියන්නද?????? අවුරුදු ගානක් දෙන්නා දෙපැත්තේ රස්සා කර කර දුක්වින්දා.... අන්තිමට දගලලා දගලලා බිරිදව මගේ රස්සාවට යන තැනම තියෙන ඒයාලාගේ අායතනයට මාරු කරගත්තා.. හිතට දැනෙන සැහැල්ලුව..... සතුට නිදහස කියන්න වචන නැහැ... දැන් හැමදේම මගේ ළගින්...... හෙට ඉදලා අායෙම ජීවත් වෙන්න පටං ගන්නවා.......

    ReplyDelete
    Replies
    1. එහෙනම්, ජයවේවා.

      ප්‍රශස්තකරණ නියමයන්ට අනුව දෙදෙනාම සේවය කරන පවුල්වලට ජීවත්වීම සඳහා ප්‍රශස්තම තැන වෙන්නේ එක සේවා ස්ථානයක් අසලම ඇති නිවසකුයි!

      Delete
  6. Grass for My Feet, eh?
    When is our Aussie Vijayatunga ( note the "V" :-) ) going to write nostalgically about his village/villages in SL? (in the book form)

    ReplyDelete
  7. 50 km yanna 1.5 hrs yanavada lankave train hodai vage ne

    ReplyDelete
    Replies
    1. හොඳ ප්‍රශ්ණයක් නිසා මං පොඩ්ඩක් සොයා බැලුවා.

      මා උදෑසන දුම්රියට ගොඩවෙන කිංග්ස්වුඩ් දුම්රිය ස්ථානයේ සිට (මෙය ප්‍රධාන නැවතුමක් නොවේ!) නෝරත් සිඩ්නි දුම්රිය ස්ථානය දක්වා ඇති දුර කිලෝ මීටර් 58 ක් පමණ වෙනවා. මා උදේ දුම්රියට නගින්නේ 8:06 ටයි. එය නෝර්ත් සිඩ්නිවලට ලඟාවෙන්නේ 9:12 ටයි. ගතවෙන වේලාව- පැයයි විනාඩි හයයි.

      සවස මා නෝර්ත් සිඩ්නිවලින් ගොඩවෙන 605 දුම්රිය කිංග්ස්වුඩ්වලට ලඟාවෙන්නේ 0714 ටයි. ගතවෙන වේලාව- පැයයි විනාඩි නමයයි.

      කොළඹ කොටුවේ සිට සමාන දුරකින් පිහිටා ඇති (ප්‍රධාන නැවතුමක් වන) අඹේපුස්සෙන් උදේ 6:14ට පිටත්වෙන දුම්රිය කොටුවට එන්නේ 8:02 ට බවයි කාලසටහනේ කියවෙන්නේ.

      Delete
    2. කොටුවට කි.මී. 60 ක් දුරින් ඇති බෙන්තොට සිට සමුද්‍ර දේවී දුම්රියේ නම් කොටුවට එන්න පුළුවනි පැයයි විනාඩි විසි දෙකකින්.

      http://eservices.railway.gov.lk/schedule/searchTrain.action?lang=en

      Delete
  8. මා ජීවත්වෙන ගමත් ඉතාම් ජනාකීර්ණ ටිවොන් නගරයෙන් කිලෝමීටර් දෙක තුනක් ඇතුලේ තියෙන්නේ,.. ගමක් නොකියා වෙන නමක් කියන්න හිතෙන්නේ නැහැ මෙහි තියෙන සුන්දරත්වය සහ නිස්කලන්ක බව නිසාම පහසු නගරයේ රැකියා තිබ්බත් මෙහි තිබෙන නිදහස් බව නැහැ..

    ට්‍රේන් එකේ ගමන් ගැන කියද්දී එච්චර වෙලා යනවද හිතුවට මෙහෙත් ට්‍රේන් එකේ ටෙලවිව් ඉදලා ජෙරුසලම් යන්න පැය එකහමාරකට වඩා යනවා 65 km වගේ දුර වුණාට . ඒකට හේතුව කියන්නේ නම් ට්‍රේන් එක යන්නේ නගරය වටෙන් ගිහින් නිසා වෙලාව යනවා කියලා,, බස් එකේ විනාඩි 50 යි යන්නේ,,,

    ලංකාවේදී මතකයි අපි වේයන්ගොඩ ඉදලා ගම්පොල යද්දී ට්‍රේන් එකේ පැය 4ක් වගේ යනවා බස් එකේ පැය තුනක් වගේ යන්නේ

    ReplyDelete
    Replies
    1. දුම්රිය ගමන ඉතා කාර්්‍යක්‍ෂමයි. වේගවත්. නමුත් විවිධ සීමා පනවා තියෙනවා ආරක්‍ෂාවට.
      මට නං කෝච්චි හොඳා බස්වලට වැඩිය!

      Delete
  9. හොඳ විස්තරයක්. හොයාගෙන එන්ට ලේසියි. ඒත් මෙල්බන්වල 'ග්ලෙන්' තරම් ඔය එකක්වත් හොඳ නෑලු.:P

    රසික දැන් 'අපේ ගම' වෙලා.:D

    ReplyDelete
  10. සබර්බයක් = තදාසන්න ප්‍රදේශයක් (ද)?

    ReplyDelete
  11. එංගලන්තයෙන් ඕස්ට්‍රේලියාවට ග්‍රාම නාම ලැබුණා වගේම, ලංකාවටත් ඉංගිරිසි ග්‍රාම නාම මෙන්ම උඩරට වැවිලි රාජ්‍යයේ නාම ලැබුණා. ග්ලෙන්ෆෝල් කියලා තේ වත්තක් නුවරඑළියේ තියනවා. මේ ලිපියේ සඳහන් නම් වලට සමාන හෝ ආසන්න නම් සහිත තේ වතු තිබෙනවා. ඒ වතුවලට සිංහල හෝ ද්‍රවිඩ නම් යොදා තේ නිෂ්පාදනය කර, පිටරට පුරුදු වෙළඳපොලට යැව්වොත් ගන්නේ නැහැ. අර වත්තේ පැරණි වෙළඳ නාමය ඒ තරම් ප්‍රසිද්ධයි, විශ්වාසවන්තයි.

    කොහේ හිටියත් ගමක ඉන්න එක හරි සැපයි. දැන් දැන් අපි ඉන්න ප්‍රදේශය වාහන අමතර කොටස් විකුණන කඩ වලින් පිරීගෙන එනවා.

    ReplyDelete
  12. රසික සිඩ්නි තීම් එකක් ඇද්ද නිසා මගේ අදහස් දැක්වීම ඒ රාමුව තුල. සිඩ්නි වලින් පිට අයට මගේ කොමෙන්ට් එක ඒ හැටි පලක් නැහැ, ඒ ගැන සමාවෙන්න

    [[නිවස කිට්ටුව ඇති පෙන්රිත් නම් නගරයේ රැකියාවක් සොයා ගැනීම ඊට වඩා හොඳ විකල්පයයි]]

    සතියකට පාරක් සීක් එකේ ගෙවල් හරියේ ජොබ් සර්ච් එකක් දාලා බලනවා. තවම මේ වාසනාව පෑදුනේ නැහැ.


    [[කොටුවට කි.මී. 60 ක් දුරින් ඇති බෙන්තොට සිට සමුද්‍ර දේවී දුම්රියේ නම් කොටුවට එන්න පුළුවනි පැයයි විනාඩි විසි දෙකකින්.]]

    හරියටම ඔය දෙක අතරේ ඔය කෝච්චියේ ද ගිය කෙනෙකු ලෙස මගේ මතය නම්, සමුද්‍රදේවී මෙහෙ ඉන්ටසිටි වලටත් වඩා වේගවත් බවයි. මෙහෙ [සිඩ්නි] ට්‍රේන් සිස්ටම් එක වෙලාවට දිව්වට ලංකාවේ කෝච්චි තරම් වේගවත් නැහැ නේද? සමුද්‍රදේවිය රුහුණු කුමාරිය ගන්න ස්පීඩ් එක අපේ එව්වට නැහැ.

    මේ කතාවේ නොවැලැක්විය හැකි දෙයක් තමා, කලකට පෙර සිඩ්නි බටහිරට යාකරන්න යෝජිත වෙච්ච රේල් ප්‍රොජෙක්ට් එක. එය ටනල් හෝ පාලම් වලින් දුවන සිටි-පෙන්රිත් පැය බාගෙකින් වගේ යන සැලසුමක්. නැවතුම් එන්නේ ඔලිම්පික් පාක් පැරමටා බ්ලැක් ටවුන් පෙන්රිත්. රසික මේක ගැන මට වඩා දන්නවා ඇති. දෙදාහ දශකයේ ආපු මේක චන්ද පැරදුමකින් කම්බස් වෙලා.

    සිඩ්නි රේල් පද්ධතිය පළමු ලෝකයේ නගරයක තත්වයේ නැති බවයි උදේ හවස එව්වයේ යන මගේ මතය. උදාහරනෙකට පර්ත් වල [ගමේ] කට්ටිය පැකිමි 130 රේල් සිස්ටම් එකක් හදලා තියේලු මහා මාර්ග වල අමතර ඉඩ යොදාගෙන. අද සිඩ්නි වල රියල් එස්ටේට් ප්‍රයිස් නගින එකත් මෙහෙ සෙසු ඔස්ට්‍රේලියාවට වඩා ඇහිරුනු ගතියක් [ටවුන් හවුසස් අපාට්මන්ට්ස් ජීවිතයක්] එන්නත් හේතුව දෛනිකව නගරය කරා එන්න හැකි වේගවත් දුම්රිය පද්ධතියක අඩුව. කිමි අසූව සීයට වැඩි පිට පලාත්වල [ග්‍රාමීය නගර] පදිංචියට ලස්සන තැන් තියෙනවා නේද වොලොන්ගොන්, නිව් කාසල්, ගොල්බර්න්, බ්ලූ මවුන්ටන්ස් හන්ටර් වැලී. මේ ටිකේ ඉඳල පැකිමි 150 කෝච්චි දුවනවා නම් මිනිස්සු එව්වට යාවි.

    මෙහෙත් ද්විපක්ෂ දේශපාලනය හා දූෂණ [ඔබෙයිඩ් සිද්ධිය වයින් බෝතලේ සැඟවුණු රහස වගේ] විසින් සංවර්ධනය හිරකරගෙන නේද?

    ReplyDelete
  13. ලක්ශන දකින්න පුලුවන්.ඩුසල්ඩොර්ෆ් කියන නමේම කියවෙන්නෙ ගමක් ලෙසයි. "ද විලේජ් ඔෆ් රයින්"ඩුසල් යනු රයින් ගගට සම්බන්ද වන කුඩා ගන්ගාවන් (ස්වුත් ඩුසල්-නොර්ත් ඩුසල්)දෙකක්.ඩොර්ෆ් යනු ජර්මන් බසින් ගම යන තේරුමයි.නගරයේ සිට යුරෝපය සම්බන්ද වෙන දුම් රිය මාර්ග (අයි.සී.ඊ වැනි )තිබුනත්,මෙහි බොහෝ දුම් රිය ස්තාන ලන්කාවේ දුම්‍රිය ස්තාන වගේමයි.කතන්දර කාරයාගේ ඒරොප්පෙ කතාවක කියාතිබුනවගේමයි.මම ඉන්නෙ නගරයේ සිට විනාඩි 6-7ක දුර ගැරස් හයිම් නියමම ගමක්,ලන්කාවෙ ඈතම පිටිසර ගමක තියෙන නිස්කලන්ක බව මෙහෙ තියෙන්නෙ.(රන්ජන්)

    ReplyDelete
  14. `හයිම් කියන්නෙත් ගම කියන එක නේද? ඔය මැන්හයිම් ඇනහයිම් කියල තියෙන්නෙ.......

    ReplyDelete
  15. ග්ලෙන් කියන්නෙ `දෙනිය' කියන එක නේද ? බම්බලපිටියෙ තියෙන්නෙ ග්ලෙන් ආබර් ප්ලේස් (තුරු දෙණිය පෙදෙස) අර මැ.කො. ඉන්න තැන.

    ReplyDelete

ඔබේ ප්‍රතිචාරය මට සතුටකි!. Your comments are most welcome!
සංයමයෙන් යුතුව ප්‍රතිචාර දක්වන්න.